CLC ti mimit nembiak deka digempung enggau ke bukai
KUCHING: Palan Pelajar Komuniti (CLC) ti diempu Perintah Republik Indonesia di Sarawak ke kurang nembiak belajar ba palan nya, deka digempung enggau palan bukai ngambika ulih ngelimat belanja.
Konsulat Jeneral Republik Indonesia (Sarawak) Jahar Gultom madah, nitihka rikod diatu bisi 16 buah CLC dibuka di Sarawak enggau penyampau nembiak 981 iku.
“Penyampau nembiak Indonesia belajar ba CLC bisi 981 iku di serata menua Sarawak, tang bisi sekeda penyampau ke belajar dalam siti kelas entara 4 ngagai 5 iku aja.
“Muka sebuah CLC enti penyampau nembiak enda mayuh semina 4 ngagai 5 iku aja dalam siti kelas, beguna belanja ti besai. Nya alai, kami benung berunding baka ni chara nembiak tu ulih digempuru sekali begulai enggau nembiak bukai (ari kebun bukai).
“Tang penanggul diatu, kebun bedandang besai tu, ambika chunto kebun A enggau kebun B enda sama kompeni. Enti ulih, bala nembiak ke ba Kebun A bekerejasama enggau Kebun B,” ku iya.
Iya madah munyi nya lebuh dikerandau pengudah bejadika Dirgahayu Republik Indonesia ke-72 di opis Konsulat Jeneral Republik Indonesia (Sarawak) di Jalai Stutong ditu,ensanus.
Urung 300 iku rayat Indonesia ke gawa sereta belajar di Sarawak sama bisi enggau ngulu pengawa nya, ke nyambut hari penumbuh Republik Indonesia ke-72.
Kelimpah ari nya, iya madah opis konsulat nya mega bisi nerima peminta ari sekeda kompeni kebun bedandang besai ke minta nengah opis nya, muka 3 buah agi CLC di menua tu nambahka penyampau ke udah bisi diatu.
“Dipelaba dalam taun tu agi bisi 3 buah CLC deka dibuka bepelasarka peminta ari kompeni kebun bedandang besai ke minta Perintah Republik Indonesia muka 3 buah agi di menua tu,” ku iya.
Palan CLC ti dikemendarka Opis Menteri Pelajar Malay- sia (KPM), menua tu digaga sereta dipelanja Perintah Republik Indonesia begulai enggau kompeni ke ngempu kebun bedandang besai nya, endur nembiak tauka anak pengereja pengawa Indonesia ke gawa ba kebun bedandang besai ditu (ke bisi permit gawa) besekula nitihka silabus sekula Indonesia.
Bala pengajar ke ngajar nembiak Indonesia ba CLC tu dibayar Perintah Republik Indonesia.
Pengawa ngerijista CLC udah dikemendarka KPM,ti beratika pemerat pengelikun sereta pengelantang pendiau nembiak Indonesia ke berumur ari tujuh taun ngagai 12 taun.
Nembiak di CLC diajar dalam Jaku Indonesia, kelimpah ari bisi penambah subjek beukai ke diajar iya nya Bahasa Malaysia enggau Sejarah Malaysia.
Siti ari pemerat muka CLC, laban Malaysia, nyadi sebengkah ari entara menua baruh ‘United Nations Convention’ ti betatika mandatori enda tau ngenggaika hak nembiak enggau pelajar sida.