Tujuh puluh nembiak ari universiti nyereta ‘XPDC Siswa Kenyalang 1.0’

SANTUBONG: Tujuh puluh iku nembiak ari 10 buah universiti ari dalam enggau luar menua ngulu program ‘XPDC Siswa Kenyalang 1.0’ ke diatur di Genturung Pendiau Salak ditu berengkah kemari nyentuk 20 Ogos 2017.

Raban nembiak universiti tu ngulu program anak iru begulai enggau lebih 100 ruang bilik ba Genturung Pendiau Salak ke alai sida deka ngaul diri ba program volunteer, kereja pemansang enggau pemaik komuniti.

Program nya kemari dipenyadi Menteri Muda Pekara Pelajar enggau Pansik Teknologi Dr Annuar Rapaee.

Bejaku rambau pengawa bejadi, Dr Annuar muji pengawa raban nembiak ti sanggup ngulu program sereta begulai enggau komuniti Genturung Pendiau Salak ba mayuh bengkah pengawa pengelama 4 hari.

“Tu mih chara pemadu manah endur raban nembiak mulaika pekara ke udah dipelajar sida nggai komuniti ditu.

“Raban tu deka nyaup ba mayuh bengkah pekara kelimpah ti meretika chara pengidup rayat ditu,” ku iya.

program netapka juluk nyaup komuniti ba pekara ekonomi, pelajar, pengerai enggau pengelantang ruang bilik.

Entara program ke disedia pengelama 4 hari iya nya licha orang dagang betanam betupi, pengawa beperesa pengerai, licha Undang-Undang dalam Islam, pengawa mandangka pekara sains enggau teknologi, forum sejarah Sarawak merdeka dalam Malaysia, beripai enggau pengawa bukai.

Program XPDC Siswa Kenyalang 1.0 diatur Halaqah Kemajuan Islam Sarawak nengah kerejasama komiti Genturung Pendiau Salak sereta ejensi perintah bukai.