Kes munuh Bill Kayong deka dipechara baru kena 18 Okt
MIRI: Kort Tinggi kemari ngemendarka pechara ngapil ungkup orang dituduh lumur satu, Mohamad Fitri Pauzi ditangguh dulu seraya nganti pemutus Kort Apil bekaul pengawa ngelepaska tiga iku orang ke dituduh ba kes tu.
Akim Ravinthran N. Paramaguru mega netapka 18 Oktober tu ila endur becharaka kes ba mua Pemantu Kanan Pengerejista ngambika madah pasal penerang kes apil nya ti deka dipechara ba Kort Apil Putrajaya.
Dulu ari nya ku iya, maya pechara kes kena 14 Jun tu tadi, Sapit Pendakwa Raya (TPR) Mohd Fuad Abdul Aziz bisi mantaika dua peminta iya nya keterubah minta pechara ( penerang nyakal ari orang dituduh) sehari nya ditangguh nyentuk apil ngelepauka orang ke dituduh kedua, ketiga enggau keempat diputuska Kort Apil.
Udah nya, ba peminta kedua, Fuad minta pengawa nya ditangguh pengelama dua minggu endur mansik notis alibi ke dirikod kena 12 Jun ke udah digaga luyar Ranbir Singh ti ngarika Fitri.
“Piak pendakwa madah pansik bekaul enggau notis alibi udah tembu.
“Nya alai, peminta piak pendakwa ti nangguhka pechara ari orang ke dituduh ke ditaga pagi tu (kemari) dikemendar laban nganti pemutus Kort Apil bekaul enggau pengawa ngelepauka tiga iku sida ke dituduh ba kes tu,” ku iya ba pechara ke diatur pengelama kurang 10 minit nya.
Fitri, 30, ari Jalai Dawai 1 Pujut 4D ditu didawa nitihka Seksyen 302 Kanun Keseksaan laban penyalah munuh nyentukka pemarai Bill Kayong.
Nyema dikenuku salah, orang ke dituduh nya ulih diukum mati.
Penyalah nya didawa digaga orang ke dituduh kena pukul 8.20 pagi, 21 Jun 2016 ba simpang lampu trafik ngerimbai Kedai Besai Emart, Jalai Kuala Baram Bypass ditu.
Udah nya kena 6 Jun tu tadi, Ravinthan tetemuka piak pendakwa mujur mantaika kes prima facie ngagai Fitri dalam kes tu, ngujungka iya diasuh bechara ngetan diri.
Ba haribulan ke sebaka, iya mutuska sida ke dituduh Lie Chang Loon, Chin Wei Chung enggau Datuk Stephen Lee Chee Kiang ke nyadi orang dituduh kedua, ketiga enggau keempat dilepau lalu dilepau mega ari tuduh besaup munuh Bill Kayong pengudah nadai bukti tegap ti ngaitka sida ari penyalah nya.
Lie, 38, ari Taman Pin Fook; Chin, 51, ari Lorong 5 Krokop enggau Datuk Stephen Lee, 45, ari Jalai Woodhouse, Tanjong Lobang ditu bela didawa nitihka Seksyen 109 Kanun Keseksaan seerta dibacha nangkan Seksyen 302 kanun sebaka ke ngundan ukum mati, nyema dikenuku salah.
Ba kes tu, ketetiga sida ke dituduh udah dituduh besaup enggau seiku agi orang agi lepau ngupah Mohamad Fitri Pauzi munuh Bill Kayong.
Sida didawa ngereja penyalah nya ba hari enggau palan ke sebaka.
Sama datai mendingka kes tu iya nya luyar Ranbir Singh, Orlando Chua, Arthur Lee enggau David Kuok sereta dua luyar pemerati ngarika sida Bill sebilik iya nya Majen Panyog enggau Jeffery Mok Hui Chung.