Inisiatif subsidi RMR1M patut disukung, ku Sagah

KUCHING: Inisiatif subsidi program Rumah Mesra Rakyat 1Malaysia (RMR1M) ke ditumbuhka perintah endang seraris enggau juluk dikena mantu raban ke kurang penatai pemisi, ku Menteri Muda Pemansang Tanah Adat Datuk Roland Sagah Wee Inn.

Nitih ku iya ke mega Kaban Kunsil Nengeri ( ADUN) Tarat, program baka nya patut disukung dikena mantu bulih rumah ke lebih menyana ba tanah diri empu.

“Aku sigi nyukung program nya laban nya sebengkah program khas ke diberi peirntah lalu mandangka pengeransing perintah mantu rayat lebih agi sida ke kurang penatai pemisi,” ku iya.

Iya madah munyi nya rambau Pengawa Nyuaka Setipikit Subsidi Ngagai Peminta RMR1M enggau Nyuaka Inden Kereja Kontraktor RMR1M ungkup sitak DUN Tarat ari Serikat Pengawa Berumah Menua Berhad ( SPNB) Pampang Nengeri Sarawak ba Opis Pelilih Mit Siburan ditu, ensanus.

Berebak enggau nya, iya merambu ngasuh SPNB berunding baru perambu ngaga rumah betiang tinggi ba sitak ke suah kena bah.

Iya mega madah piak kontraktor ke bekaul enggau program nya patut ngereja nya nyadika tanggungpengawa rama ( CSR) ngagai rayat, udah nya ngaga rumah enggau manah, jampat sereta meri pemuas ati ngagai semua piak.

Nangkan nya, Roland mega bisi minta Opis Tanah enggau Sukat ( JTS) ngelengkaska pengawa nyukat tanah ke tuju meri surat pala tanah lebih agi orang ke minta sida ke agi biak udah beruang bikik tentu deka minta rumah ‘mesra rakyat’.

Berebak enggau nya, iya minta piak bekuasa ngelengkas pengawa ngemanahka Jalai Padawan ke udah dikemendarka Menteri Besai taun 2015.

Ba pengawa nya, bisi 12 iku peminta nerima setipikt subsidi program RM1RM, udah nya lapan kontraktor nerima inden kereja ungkup pengawa ngaga RMR1M ba sitak DUN Tarat.

Pengawa nya bela dikemataka Pemesai Penyambung SPNB Negeri Sarawak Wan Habeeb Alli Wan Yep Mohdzar enggau Angela Ajas ngarika piak Opis Pelilih Mit Siburan.

Ba pengawa nya mega, Sagah bisi nyuaka tiga kerusi roda ngagai penerima.

Bisi 61 peminta ari sitak DUN Tarat nerima bantu nya, 21 unit udah disua kunchi lalu 14 unit dikemendar ba taun 2017.