Barisan Nasional gawa ke rayat ukai ketegal pengawa bepilih

KUCHING: Perintah Barisan Nasional ( BN) ukai gawa ungkup pengawa bepilih, ku Menteri Kereja Raya Datuk Seri Fadillah Yusof.

Tang kebendar, ku iya ke mega Kaban Parlimen Petra Jaya, BN lebih agi Parti Pesaka Bumiputera Bersatu (PBB) bejalaika pengawa ke rayat sepanjai maya ke pemaik menua enggau nengeri tu.

Iya madah munyi nya lebuh dipinta nimbal media pasal seiku kaban Parti Keadilan Rakyat (PKR) Datuk Dr Nor Irwan Ahmat Nor diatu regas bekimpin ungkup Pengawa Bepilih Besai (PRU) sitak parlimen Petra Jaya.

“Nya hak sida. Kitai (BNPBB) gawa ukai semina maya pengawa bepilih besai, tang kitai gawa sepanjai maya ke rayat nengeri enggau menua tu, enda ngira maya pengawa bepilih besai tauka enda.

“Kitai mega seruran ngabas rayat mendingka penanggul sida,” ku iya rambau dirandau pemberita ba sebengkah pengawa ke diatur ditu, kemari.

Ku Fadillah, BN mega seruran ngiga jalai mutarka penanggul sereta ngintu pengelantang pendiau rayat nyengkaum pengerai sida sepanjai maya lalu ukai semina ‘ayan’ maya pengawa bepilih besai aja.

Nor Irwan ke dipesebut nyadi chalun bepenau PKR disabung ngerampas penuduk Petra Jaya ari BN ba PRU ke dipelaba enda lama agi.

Tambah mega, Nor Irwan suah dipeda ngelawa sekeda palan ba Petra Jaya ba pengawa kimpin tumu seraya dibanti Pemantu Khas Chairman Parti Tindakan Demokratik (DAP) Abdul Aziz Isa.

Nor Irwan seiku ex-lecture tang diatu ngemeranka pengawa dagang.