Brooke Dockyard, Petronas mujur nyain sempekat kerejasama bejalaika projek
KUCHING: Brooke Dockyard enggau Petronas Carigali Sdn Bhd udah mujur nyain kontrak kerejasama bejalaika dua projek iya nya Bokor Phase 3 Re- development enggau Anjung Gas Development ti berega urung RM480 juta.
Pengawa nyain kontrak kerejasama nya kemari dikemataka Kepala Menteri Datuk Amar Abang Johari Tun Openg, ke diatur ba sebengkah hotel ditu.
Petronas diarika Vice Presiden, Malaysian Assets, Development & Production Mohd Jukris Wahab sereta besaksika Ketuai Procurement, Group Procurement Noor Mohamad Taj Mohhammed.
Lalu Brooke Dockyard diarika General Manager, Norhizan Sazali sereta besaksika Procurement Manager Lubau Genam.
Lebuh ke meri jaku pengelalu ba pengerami nyain kontrak kerejasama nya kemari, Chairman Brooke Dockyard Datuk Abang Abdul Karim Abang Openg madahka sempekat ke disain nya iya nya kerejasama bejalaika Provision of Engineering, Procurement, Construction and Commisioning (EPCC) ungkup Anjung Facilities sereta Provision of Front End Engineering Design (FEED) enggau Engineering, Procurement, Construction, Installation & Commissioning (EPCIC) Wellhead Platform (WHP) ungkup projek Bokor Phase 3 Re-development.
“Projek tu dipejalaika dalam timpuh 33 bulan enggau 43 bulan ungkup Angjung WHP enggau Bakor WHP ti nyengkaum ngelangkar pasal kejuruteraan ti chukup berat ba kami tang kami chukup komited sereta arap bendar kami ulih bejalaika projek tu nitihka udah ditimpuhka.
“Sehari tu kami nyain kontrak kerejasama EPCC enggau EPCIC ungkup Projek Anjung Wellhead Platform enggau Bokor CODP-D/E/F Wellhead Platform ke dikeempu Petronas Carigali Sdn Bhd,” ku Abang Karim.
Projek Bokor bepalan di Baram Delta ba Laut China Selatan ti urung 45km Barat Laut Lutong, Miri diberi ngagai Brooke Dockyard kena 12 April 2017, ti berega urung RM290 juta.
Lalu projek Anjung ti udah diberi Petronas ngagai Brooke Dockyard kena 25 April tu tadi ti berega urung RM189 juta, bepalan di luar pantai dalam Central Luconia Province ti urung 180 km Barat Laut Bintulu.
Kelimpah ari nya Preisden enggau Gropu CEO Petronas Datuk Wan Zulkiflee Wan Ariffin lebuh ke bejaku ba pengerami ke sama madahka kerejasama nya sejarah baru ngagai protronas.
“Kontrak kerejasama tu sebengkah ari chara kami ngayanka komitmen kami nyukung juluk perintah nengeri ke deka ngangkatka pakar menua tu dalam tambah nilai industri, sereta kami temegah ati begulai enggau Brooke Docyard dalam kededua projek tu,” ku iya.