Isu belajar dua sesi deka dibai ngagai KPM
KUCHING: Isu dua sesi belajar enggau ngajar ke agi bisi nyadi ba nengeri deka dibai ngagai Opis Menteri Pelajar Malaysia ( KPM), ngambika sekula Sarawak semina bisi seiti sesi aja iya nya sesi pagi.
Menteri Muda Pelajar enggau Pansik Teknologi Dr Annuar Rapaee madahka diri deka mai pekara nya berindik ari ti ngasaika dua sesi nya enda senipak bendar lebih agi sesi lemai.
“Aku ngasaika deka deka mai isu tu ngagai opis menteri (KPM) ngambika di Nengeri Sarawak enda patut agi bisi dua sesi ( ngajar enggau belajar).
“Laban bisi dua sesi tu, laban enti muakka lemai gaya hari ti panas di menua kitai sereta enggau alai ke sekut, aku ngasaika nadai patut bisi dua sesi (ngajar enggau belajar).
“Baka ke dipadahka ngagai aku, SMK Pending tu bisi dua sesi iya nya pagi enggau lemai,” ku iya seraya madahka penumbuh opis menteri pelajar Sarawak tu ngambika ulih bekerejasama enggau opis menteri nya renggat perintah besai.
Dr. Annuar mansutka pekara nya lebuh ke bejaku ba ‘Program Ceriaton & Gotong Royong Perdana’ nyerumba Karnival Kokurikulum & VOTEK SMK Pending, ditu, kemari.
SMK Pending ti bisi urung 1,385 iku nembiak besekula dua sesi iya nya sesi pagi ungkup nembiak Form 4 ngagai Form 6 lalu sesi lemai iya nya ‘Peralihan’ ngagai Form 3.
Nambahka nya, Dr. Annuar ngelalau nembiak ngambika bisi pengerindu sereta ngemeratka STEM (Sains, Teknologi, Injiniring, Matematik) senipak enggau perintah nengeri ti ngemeratka ekonomi digital.
Nitih ku iya, nembiak sekula ke maya hari tu enda tentu bisi pengerindu ngagai subjek sains berindik ari ke takut enda pas ba Form 5, enda pas subjek sains sereta nadai pengerindu ngagai subjek nya.
“Perintah kitai diatu chukup beratka ekonomi digital, nya alai STEM amat beguna ba nembiak sekula kitai.
“Nya alai kitai enda tau enda nempa pengerindu anak kitai rinduka STEM tu kenyau ari sekula rendah,” ku iya.
Kelimpah ari nya lebuh ke ngenang pasal program sekula nya pagi kemari, Prinsipal ti mega chairman program nya, Yong Ing Thung madahka program nya dikena ngempitka kaul sekula enggau PIBG enggau peranak ke semak sekula.
“Tuju kami ngatrur program tu dikena ngiga belanja awakka bisi dikena ngemanahka geladak balai sekula enggau Taman Persada Harmoni,” ku Yong dalam jaku pengelalu.
Berebak enggau tu Dr Annuar ti ngarika Menteri Pelajar, Sains enggau Pansik Teknologi Dato Sri Michael Manyin Jawong madahka meneri nya (Manyin) ngungkupka RM10,000 ngagai PIBG sekula SMK Pending dikena ngatur aktiviti. KUCHING: Opis Menteri Pelajar Malaysia ( KPM) deka besaup enggau ejensi perintah sereta gerempung ukai dikuasa perintah (NGO) mutarka penanggul ba sekula ‘hot spot’, ti dipadahka bisi penanggul disiplin enggau dadah, baka ke benung dikerembaika diatu.
Bepelasarka penerang Bahagian Pengurusan sekolah Harian kena 16 Ogos 2016 ari KPM, Sekula ‘hot spot’ reti iya ba kandang endur tauka alai ti bisi risiko. Ti nyata agi iya nya kandang endur ke suah nyadi pekara ti enda manah baka penyalah berat enggau ke bukai.
Sekula ke dalam rintai ‘ hot spot’ nya ukai reti iya sekula nya ‘in nature’ ke mai penanggul disiplin nembiak.
“Sekula ti dirintai nyadi ‘hot spot’ nya enda patut irau laban nya ukai proses ‘labelling’ ngagai sekula, tang nya atur pengurusan ti strategik dikena ngemudahka pejalai program ti mekuh ngagai raban ke patut.
“Laban pun penanggul tu mayuh, nya alai KPM setuju penanggul nya diputarka enggau mayuh ejensi baka PDRM, Raban Soldadu Malaysia ( ATM), Opis Menteri Pengerai sereta NGO baka Yayasan Pence- gahan Jenayah Malaysia (MCPF) nyengkaum PIBG enggau tuai raban bansa.
“Seiti ari inisiatif besai ke udah sama dipesetuju iya nya inisiatif NBOS, ngatur program nagang begulai enggau egensi seri NGO nya. Entara program ti dipejalaika nyengkaum ‘Kem Remaja Berwawasan’ sereta ‘Polis Perhubungan Sekolah (PPS)’,” ku penerang Bahagian Pengurusan Sekolah Harian.
Isu disiplin iya isu ngelanggar atur sekula ke nyadi ba bala nembiak. Bepelasarka penerang KPM, isu nya nyadi laban mayuh kebuah, ukai ketegal ari sekula aja tang nyengkaum penatai nembiak ke bekaul.
Bepelasarka berita ke benung dikerembaika diatu, dipadahka KPM bisi mantaika rintai nama 402 buah sekula ‘hot spot’ disereta menua ti bisi penanggul disiplin enggau dadah ke nyengkaum 10 buah di Sarawak.
Di Sarawak, 10 buah nyengkaum di Kuching; Padawan; Bau; Sri Aman; Miri; Baram; Lawas; Simunjan; Samarahan enggau di Bintulu.
Kelimpah ari nya be sebengkah pengerami ke diatur SMK Pending ditu kemari, Menteri Muda Pelajar enggau Pansik Teknologi, dr Annuar Rapaee lebuh ditanya pasal isu nya, iya bepenemu rintai nama 10 sekula ‘hot spot’ Sarawak ke dipadahka betapi enggau penanggul disiplin sereta dadah patut dituku tauka ditentuka dulu pengamat.
Iya madahka mensia mayuh enggau raban media dipinta anang mudah arap tauka ngerembaika berita bepelasarka penerang ari sepiak aja, tang tukuka ari penatai ke betul.
Kebuah pia ku iya laban bisi sekula di Sarawak ke dirintaika dalam nya sekula ti pemadu manah.
“Aku nemu tu isu ke amat beguna iya nya pasal disiplin tang patut nentuka dulu sekalika rintai nama sekula nya amat tauka enda.
“Seiti ari rintai nama sekula iya nya (SMK) Sg Tapang, dulu suba engka tang sida udah berubah nyadi sebuah sekula ti pemadu manah,” ku iya lebuh ti dikerandau raban pengudah bejadika’ Program Ceriaton & Gotong- Royong Perdana’ nyerumba Karnival Kokurikulum & VOTEK SMK Pending, kemari.
Iya madahka opis menteri pelajar nengeri tu deka bepelasarka atur ke digaga perintah besai, mutarka pekara nya.