GAP komoditi getah nyaup ngangkat asil orang bekebun
Nyadi sebengkah chara bekebun getah ti ngembuan standard enggau penetap pengudah dipansik
LUNDU: ‘Amalan Pertanian Baik (GAP)’ ba komoditi getah ke dikenuku RISDA nyaup ngangkatka asil bekebun sereta nambah penatai pemisi orang bekebun, ku Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi.
Ku iya, GAP nyadi sebengkah chara bekebun getah ti ngembuan standard enggau penetap lalu dikenuku pengudah mayuh pansik dipejalai.
“GAP mega seraris enggau juluk perintah ti deka ngangkat penatai pemisi orang bekebun mit ba ikas RM4,000 sebulan manggai ba taun 2020,” ku Nanta.
Iya mansutka jaku nya rambau bejadi Konvensyen ‘ Amalan Pertanian Baik(GAP)’ RISDA Nengeri Sarawak 2017 ke diatur di Kem Bina Negara Sampadi, Lundu kemari.
GAP ku Nanta numpuka empat pengawa berat iya nya chara nanam sereta ngintu, chara meri baja, chara ngasuh pun getah galak enggau chara nangkal.
“Empat bengkah pengawa tu deka nentuka tetiap pun getah ulih ngemansutka asil ke dikearap, iya nya dalam timpuh empat taun setengah pun getah tau ditangkal,” ku iya ke mega Kaban Parlimen (MP) Kapit.
Nengah GAP, Nanta pechaya puku rata asil tauka produktiviti getah ulih mang- gai 1710kg sehektar setaun.
Dikena nentu semua juluk dijapai, KKLW ku Nanta ngagihka RISDA Sarawak RM1.3 juta ungkup Program Servis Ngerembai enggau Ngembing GAP.
Ari penyampau nya, RM124,400 diungkup ba pengawa matih sereta ngajar GAP ngagai orang bekebun mit RISDA di selampur Sarawak.
Bepelasarka agih belanja nya mega, RISDA udah merambu ngatur 34,800 pengawa ngembing GAP semanjai taun 2017. Sepenyampau 8,700 orang bekebun mit deka teulih pe- maik ari program tu, tandu Nanta. Ngenang kaul ke sama, Nanta madahka KKLW nen- gah RISDA udah ngagihka belanja RM41.2 juta ngagai Sarawak ungkup program ‘Tanam Semula’.
“Ketegal nya kitai ngarap tetiap bantu ke diberi ulih diguna enggau manah ngambika juluk perintah ti dekaka peranak Malaysia ngembuan penatai pemisi RM4,000 sebulan ulih dijapai ba taun 2020,” ku iya.
Ba pengerami kemari Nanta bisi nyuaka setipikit chiri ngagai 53 iku ‘Pemaju Masyarakat RISDA (PMR)’.
Iya mega bisi nyuaka Tokoh GAP Pusat Tanggungjawab (PT) enggau Tokoh GAP Risda Nengeri Sarawak 2017.
Lim Ah Teck ari Kemintin Klauh, Sri Aman bulih gelar Tokoh GAP RISDA Nengeri Sarawak ungkup taun 2017.
Bela datai Direktor Bagi Ngerembi enggau Mindahka Teknologi RISDA Zainabon Ismail, Direktor RISDA Sarawak Zulkifli Zaini sereta orang bukai.
GAP mega seraris enggau juluk perintah ti deka ngangkat penatai pemisi orang bekebun mit ba ikas RM4,000 sebulan manggai ba taun 2020. Datuk Alexander Nanta Linggi Sapit Menteri Pemansang Menua Pesisir enggau Kandang Menua