Sukung pengari rayat nyaup komiti mujur ngatur Pekit Pidato Jaku Iban ti keterubah
KUCHING: Komiti pengatur Pekit Pengelandik Bejaku (Pidato) JAKU Iban ti keterubah meri terima kasih ngagai lima iku pengari rayat ti udah nyaup ngemujur pekit nya.
Bala sida tu iya nya Sapit Kepala Menteri Tan Sr Dr James Masing ke mega patron pekit nya; Menteri Muda Nembiak Lumba enggau Main Snowdan Lawan; Sapit Menteri Dalam Nengeri Datuk Masir Kujat; MP Lubok Antu Datuk William Nyallau Badak enggau MP Hulu Rajang Datuk Wilson Ugak Kumbong.
Sida udah nyukung Pekit Pidato Iban UB-Aedil 2017, ke diatur pengelama dua hari nya nengah agih belanja ke diberi dikena ngemujur pekit nya.
Sekretari komiti pengatur Mathias Kassap Gasan madah: “Aku meri terima kasih ngagai bala pengari rayat ti udah mantu ngemujur pekit tu diatur.Pemeri ari sukut belanja ari sida pekara ke beguna amat kebuah Pekit Pidato Iban UB-Aedil ti keterubah tu mujur diatur. Aku mega meri terima kasih nagagi bala bukai ti udah mandangka sukung. Sida tu iya surat berita Utusan Borneo enggau The Borneo Post, See Hua Marketing, stesyen radio radio Cats FM enggau Wai FM ti udah nyaup ngerembaika berita pasal pekit sereta Ranyai Studio ti udah mantu nyendiaka rengka ‘sound system’.”
Gerempung Pemansang Pelajar Jaku Iban (AEDIL) mega udah nyendiaka akim ti chukup landik sereta peneleba, ku Mathias seraya madahka surat berita Utusan Borneo Seksyen Iban deka ngetanka kaul manah entara UB-AEDIL.
Iya mega madah, bala pe- sereta mega bisi minta komiti pengatur pekit ngatur baru dudi ila laban nya ulih mantu komuniti Dayak ngetan, ngintu sereta ngerembaika jaku Iban.
Iya bejaku munyi ba Pengerami Mit Gagaka Pemujur ngatur Pekit Pidato Iban UB-Aedil 2017 ti keterubah, ba Rumah Pansuh Dayak, Jalai Muara Tuang Kota Samarahan kena malam Hari Lima tu tadi.
Sekretari AEDIL Harold Unsie ke bejaku dulu ari nya ngenataika pengaga ati laban nyadi sebagi ari raban pen- empa sejarah ngatur pekit ti keterubah, renggat nengeri nya.
Sida deka majakka meri servis ke dinamik sereta profesional kelebih agi nyadi akim ba sebarang pekit seraya ngerembai enggau ngenegap jaku Iban.
Chairman komiti pengatur, Churchill Edward Drem ba jaku pengelalu dulu ari nya madah, taun baru sida merambu deka nyendia kategori bukai ngambika mayuh agi bala pesereta lalu ulih matak sukung ari mensia mayuh ngagai pekit nya.
Ku iya, kategori ti diperambu iya nya ungkup bala nembiak sekula, bala nembiak ke nampung pelajar ba palan pelajar tinggi enggau veteran.
Iya mega meri terima kasih Yb Snowdan ti udah meri agih belanja tumu RM10,000 dikena ngatur pekit nya taun baru.
Snowdan ngarika Masing bejadi pekit renggat final ke diatur kena 5 Ogos ba Auditorium TAZA, IPG Batu Lintang Kuching.
Ba pengawa nisih pesereta ke diatur kena 4 Ogos ba Hotel Kingwood Jalai Padungan, 27 iku nembiak ari sekula sekondari serata Sarawak udah datai ngerebut enam penuduk ba renggat final.
Kelimpah ari nembiak sekula sekondari, finalis ari dua kategori bukai iya nya nembiak IPT enggau Tebuka Baruh 45 taun bela sama ngerebut gelar champion ba renggat final nya.
Pemenang ari tetiap kategori nerima perasi mata duit enggau trofi lalu perais sagu ati diberi ngagai pesereta ti ba penuduk lumur empat nyentuk lumur enam.