Pengawa ngitang Jalur Gemilang ulih mandang penaluk ke menua
MIRI: Semangat talukka menua ba rayat Malaysia ulih dipandang nengah pengawa ngitang tambai Jalur Gemilang kelai ingatka Hari Merdeka.
Kaban Parlimen ( MP) Sibuti, Ahmad Lai Bujang madah nadai salah nyema rayat ngereja pengawa ke bansa nya di rumah enggau entukar diri empu kelai talukka menua.
“Tu kelai kedaulatan menua lalu kitai peranak Malaysia patut bebasaka tambai ti nyadi kelai temegah nama menua merdeka,” ku iya.
Ahmad Lai mansutka jaku nya lebuh bejadika Pengawa Ngelepas Program Kembara Merdeka Negaraku Sepakat Komuniti 1Malaysia di Laman Wisma Persekutuan Miri kemari.
Pia mega ku iya, tuju Hari Kebangsaan ke-60 berambaika jaku ‘ Negaraku Sehati Sejiwa’ dikena ngayanka peranak Malaysia endang patut ngembuan semangat beserakup.
Ulah talukka menua ku iya patut seruran diterenak dalam tetiap iku peranak Malaysia kelebih agi rebak baru ngambika sida bisi pengiruh enggau pengibuh ba pengawa ngemansangka menua.
“Pengelantang menua bansa patut dijaga nengah pengawa kitai ke nyadi peranak iya sedia bekerejasama enggau pangan diri, belalauka penau diri empu nyapai Transformasyen Nasional 2050 (TN50),” ku iya.
Nitih ku iya, sekeda hari bulan endang patut dikenang rebak baru nentuka sida nemu sereta meretika reti ke bendar merdeka.
“Hari bulan besai baka 31 Ogos enggau 16 September sereta di Sarawak kena 22 Julai patut dikeingat ngambika sida meretika pekara besai ke nyadi ba hari bulan nya,” ku iya nyemetak.
Berebak enggau nya, perintah ku iya nyediaka mayuh macham perengka guna ungkup pelajar bala anak lalu nadai kebuah apai indai enggai nganjung bala anak sida besekula.
“Perintah nyediaka bemacham perengka guna nyengkaum sekularship enggau duit jali nentuka bala anak nerima pelajar menyana sereta ulih ngubah pengidup dudi hari menyana agi,” ku iya nerang.
Pia mega, semina nengah pelajar aja ulih ngubah nasit sida, nya kebuah apai indai patut nyediaka pelajar menyana ngagai bala anak.
Ngelansa program nya, bisi 500 iku pesereta bejalai matau menua bebala mayuh ti ngaul 30 buah entukar bemacham bansa sereta 40 buah motosikal besai ngambi bagi dalam program ti diatur Opis Pemadah Malaysia Miri enggau Bintulu.