Penyerakup enggau pengelantang menua patut dijaga enggau manah
KAPIT: Kaban Kunsil Nengeri (ADUN) Bukit Goram, Jefferson Jamit Unyat minta peranak ditu terus ngetanka penyerakup enggau pengelantang menua.
“Pengelantang enggau penyerakup ke diasai ngelama tu patut dijaga manah dalam pengidup besehari- sehari. Pemanah tanggam kaul, kerejasama enggau diau bebaik enggau pangan diri meseti dikemeran.
“Pemesai guna pengelantang enggau penyerakup ba pekara diau dalam pupu bansa patut diterenak ngagai rebak baru,” ku Jamit lebuh bejadika Program Negaraku Sehati Sejiwa Renggat Bagi Menua Kapit, pagi Hari Enam, di Palan Sivik Kapit ditu.
Ku iya, penegap Kapit datai ari pengawa begulai bebaik, pemanah tanggam kaul, beserakup enggau bekerejasama semua, nadai ngira bida bansa, pengawa rama enggau jalai pengarap.
“Kami semua beserakup enggau pangan diri. Kapit nyadi teladan pemadu manah mantaika konsep 1Malaysia lalu aku dekaka pekara tu nyadi jalai pengidup kitai,” ku tandu Jamit.
Iya madahka taun tu Mukah dipadu nyadi tuai rumah ngatur pengawa ngintu Hari Merdeka. Rambai jaku ‘Negraku Sehati Sejiwa’ minta semua kitai begempung napi pemar arus pemansang teknologi moden.
Mayuh bengkah aktiviti udah dirintai kena ngintu pengerami nya baka sesais aerobik, bejalai bebala mayuh meling pasar Kapit, pekit nyura nembiak mit, Mandangka Pengawa Dagang Pesta Kapit, pengawa beripai di Palan Pemulai Pemanah Ulah Dalam Komuniti, Program Ngirup Lemai enggau ke bukai.
Program tu udah disereta beratus iya ke datai ari semua serak pengidup baka bala ketuai opis perintah, ketuai raban bansa, nembiak sekula sereta raban gempung ukai dikuasa perintah (NGO).
Sekeda bala temuai dipebasa ke bisi datai baka Residen Kapit Joseph Belayong, Sapit Residen Kapit Galong Luang, Ketuai Kunsil Opis Pelilih Menua Kapit Philimon Nuing sereta bala bukai.