HDC udah nyuaka surat rumah ungkup sida ke bulih RMR
SARIKEI: Serikat Pemansang Pengawa Berumah ( HDC) udah nyuaka surat meli rumah ti dikemendar ari baruh program Rumah Mesra Rakyat (RMR).
Peminta tu nyengkaum 35 iku ari Sarikei enggau 20 iku ari Tanjung Manis, Ketuai Seksyen Perhubungan Awam HDC, Ali Omar Su’ut mansutka jaku tu lebuh nyuaka surat nya ba Opis HDC di Taman Susur Jambu ditu, kemari.
Bala sida agi ulih ngaga pemutus sekalika setuju tauka enda nerima surat nya tang sida dipinta meri saut enggau jampat, ku iya.
Berindik ari peminta tu ari baruh program individu RMR, rumah berega RM74,000 seunit deka digaga ba lot tanah sida empu, ku iya.
“Taja pia, penyampau jali semina RM54,000 aja laban RM20,000 agi deka disubsidi perintah besai,” ku iya nerang.
Rumah tu deka digaga pengudah semua atur surat tembu, ku iya, seraya nambah, baka selama deka begunaka tiga bulan pengelama ngaga seunit.
Sida ke minta dipinta mayar rumah nya pengudah sida nerima kunchi, ku iya seraya nambah, RM350 bayar sebulan dalam timpuh 25 taun tauka 300 bulan.
Semina sida ari ruang bilik bepenatai pemisi enda ngelui ari RM3,000 sereta enda kurang ari RM1,500 aja tau minta skim jali rumah RMR, ku iya nerang.
Sida ti ulih minta dipinta nganjung peminta sida nengah opis Kaban Parlimen tauka Kaban Kunisl Nengeri ti deka dianjung ngagai syarikat Perumahan Negara Bhd ngambi dikemendar, ku iya, seraya nambah, peminta tu deka diberi ngagai Opis Tanah enggau Servey enggau Bank Negara ngambika dikenuku.
Sama bisi datai Pemesai RMR HDC, Kusairi Sani.