36 ‘sampel’ ukui, enam mayau di tiga bagi menua positif rabies

KUCHING: Naka ke diatu, bisi 36 sampel ukui enggau enam ‘sampel’ mayau ari bagi menua Kuching, Serian enggau Sri Aman udah disahka positif ari 180 pemutus sampel ti diterima.

Bepelasarka penerang berita ke dikeluarka Sekretariat Komiti Mutarka Penusah Ngenyit Nengeri ( JPBN) Sarawak naka pukul 5 lemai kemari, bisi 210 sampel jelu ke udah dianjung ngagai VRI, Ipoh ngambika diuji sekalika bisi virus rabies tauka nadai.

Ari penyampau 210 sampel ke danjung, nya nyengkaum 192 sampel ukui, 17 sampel mayau enggau seiti sampel semawa ke diambi agi bagi menua Kuching, Sri aman, Serian, Samarahan, Betong, Sarikei, Sibu enggau Miri.

Kemari, bisi 130 iku ukui dituchuk vaksin rabies nengah Program Pemvaksinan Haiwan Kesayangan dikena nagang penyakit nya ngerembai di bagi menua Serian.

Nya ngujungka penyampau semua ukai di menua tu ke udah dituchuk baksin nya bisi 32,532 iku jelu ke dikesayau nyengkaum 24,889 iku ukui, 7,597 iku mayau enggau 45 jelu bukai.

Opis Servis Vetarinar Sarawak ( JPVS) neruska aktiviti mansik kes igi penyakit rabies ke alai bisi 36,507 survelan aktif enggau 890 survalen pasif dikena nagang penyakit nya berampit, ke udah dipejalaika opis nya di kandang menua Serian, Kuching enggau Sri Aman.

Operasi bersepadu entara Opis Menteri Kaunsil Kandang Menua begulai enggai JPVS, naka ke diatu udah nangkap 1,099 iku ukui lelang di bagi menua Kuching, Serian, Sri Aman, Sarikei, Samarahan enggau Betong, iya nya seiti ari chara nagang pemayuh ukui lelang nya sereta wakka ulih nyeliahka pengelekai igi penyakit nya.

Opis Pengerai Nengeri Sarawak bisi 39 kes ketup baru ke diriputka kemari iya nya 9 kes di bagi menua Serian, 3 kes di Sri Aman enggau 27 kes di bagi menua Kuching.

Ari penyampau nya bisi 31 kes jelu tupi ti dikesayau nyengkaum 18 kes ukui enggau 13 kes mayau, lalu lapan kes iya nya jelu lelang ti nyengkaumukui tujuh kes enggau seiti kes mayau.