Nembiak IPG Rajang nyungkak jaku tangkai mengandai nengah Pekit Pidato Jaku Iban
INSTITUT Penarak Pengajar Kampus Rajang (IPG Kampus Rajang) ti endang tampak rita ketegal udah mujur nempa bala pengajar ti belajarka jaku tangkai mengandai kitai, iya nya Jaku Iban ba tikas “Bachelor” ti keterubah udah mujur nganjung tiga iku nembiak nyerumba Pekit Pengelandik Bejaku Jaku Iban ti diatur Utusan Borneo begulai enggau Gerempung Pemansang Jaku Iban (AEDIL). Pemekit ti dianjung iya nya Erica Leenya Anak Eben iya nya siku ari nembiak ti benung belajarka Jaku Iban ba tikas degree ba IPG Kampus Rajang lalu diatu benung ba semester ti kepenudi iya nya semester 8. Nangkanka nya, Brolin Anak Golayous iya nya siku ari nembiak ti bisi dianjung bepekit ti benung mega belajarka jaku Iban ba tikas degree lalu diatu benung ba semester 3. Ke penudi endar, Michael Bandang Anak Tinggai ti diatu ba semester 1 ngambi kus Jaku Iban mega ba tikas degree. Tiga iku nembiak tu sama bela bepekit ba kategori “Nembiak IPT/Institut/Institut Pematih”.
Pekit tu iya nya pekit pengelandik bejaku Iban ti keterubah endar diatur ba tikas ti tinggi diatur ba Auditorium TAZA IPG Kampus Batu Lintang ungkup renggat ke penudi. Sebedau tu, Institut Penarak Pengajar Kampus Rajang udah kala ngatur pekit ti sebaka taun nyin kemari tang semina diatur ba tikas kampus aja, iya nya beserimbai enggau Pekit Pidato Tiga Bansa Jaku (Jaku Melayu, Jaku English enggau Jaku Iban) IPG Kampus Rajang.
Pemutuspekittungenudukka Michael Bandang Anak Tinggai ba penuduk lumur 1 ari tujuh iku pemekit. Topik ti mujur ngenudukka iya ba penuduk lumur 1 iya nya “Pengerembai Jaku Iban Ba Nembiak Sekula”. Michael ti nyimpulka pidato iya enggau leka main Jawang madahka diri gaga udah mujur bulih penuduk lumur 1 lalu ngarapka mayuh agi orang nyereta pekit tu dudi hari ila. Michael siku ari nembiak ti datai ari Saratok mai pula trofi enggau mata duit RM2,000 enggau satipikit penyereta.
Brolin Anak Golayous mega mujur teulihka penuduk lumur dua ba kategori “Nembiak IPT/Institut/Institut Pematih”. ”Aku berasai temegah ati ulih tesangkaika diri ba penuduk lumur dua. Ngarapka nengah pekit pida- to tu pengerindu ati angkunka jaku Iban ulih disungkak kelebih agi ba generasyen ke baru.” Ku Brolin ti bejuraika topik “Penanggul Ngerekaika Jaku Iban Ngagai Tikas Ti Tinggi”. Endang amat munyi ku leka main anak mit Indung-indung ti diserengutka Brolin dikena nyimpul jurai pidato iya Hari Enam tu tadi, “Indung- indung, angkat mansang anak Iban ngerekai jaku tangkai mengandai sama bela begempung”, kitai Iban patut begempung ngerekaika jaku Iban ngagai tikas ti tinggi. Brolin ti datai ari Betong bulih lumur dua lalu mai pulai trofi, perais mata duit RM1,500 enggau satipikit penyereta.
Penuduk lumur tiga pulai ngagai Nicholas Beliang Engkabi ari Institut Pertanian lalu ditangkanka Erica Leenya Eben ari IPG Kampus Rajang ti ba penuduk lumur empat. Siku ari nembiak kohort keterubah ti ngambi Jaku Iban ba tikas degree ti kala ditarak ba IPG Kampus Rajang, Suda Anak Lunyong bisi mega ngambi bagi dalam pekit tu lalu mujur teulihka penuduk lumur tiga ba Kategori Tebuka Baruh 45 taun.
Pekit ti baka tu sigi dianti bala nembiak IPG Kampus Rajang ti ditarak nyadi pengajar Jaku Iban. Ukai ketegal gagitka perais tauka rindu mantaika diri ba mua orang mayuh tang ketegal bala nembiak tu ti angkunka jaku tangkai mengandai kitai laban nangika lesi ditabanka hari, sulai ditabanka lemai. Bala nembiak tu ti endang ditarak bala pengelicha Jaku Iban ba IPG Kampus Rajang ngambika rindu sereta angkunka jaku bansa diri ngasaika tu siti ari platform ti ulih dikena ngerembai sereta ngerekaika agi jaku Iban ngagai tikas ti tinggi ngambika seraris enggau jaku bansa bukai ti jauh udah nyulut. Sida tiga ngarapka taun baru mayuh agi orang nyukung sereta nyereta Pekit Pengelandik Bejaku Jaku Iban ti diatur Utusan Borneo begulai enggau Gerempung Pemansang Jaku Iban (AEDIL) kelebih agi bala nembiak bebansa Iban ti benung belajar ba IPTA, IPTS tauka Institut.