Perundingka perengka guna ungkup bebasikal di Sibu
Diatu mayuh sebana nadai perengka guna engkeman alai bebasikal kelimpah ba Taman Tasik Permai
SIBU: Perintah nengeri dikeandal nyaup sitak tu nempa atlet lumba basikal laban diatu pengawa bebasikal lebih agi dikereja dikena ngelantangka ati tauka dikena nembuka awak lepa.
Chairman Opis Kaunsil Pelilih Sibu (SMC) Datuk Tiong Thai King madah, mensia mayuh ditu suah amat sebana laban nadai endur tauka perengka guna ti engkeman alai sida bebasikal kelimpah ba Taman Tasik Permai tang jauh ari pasar SIbu.
“Nya alai, kitai andal amat perintah nengeri ulih berunding nambah tauka nyediaka sitak tu perengka guna ke engkeman alai bebasikal baka track, track alai belumba baka BMX, jalai tauka palan ‘moutain bike’ enggau iya ke bekaul ke bukai.
“Enti perengka guna bisi sereta chukup, kitai di Sibu mega ulih ngangkat sereta matih sida ke landik ba pengawa bebasikal nyentuk nyadi atlet,” pia ku iya madah.
Iya mantaika jaku tu maya bejadi Jerayawara Berbasikal 2017 ba Wisma Sanyan ditu, kemari.
Sama bela datai maya tu iya nya Residen Sibu Hii Chang Kee enggau Ketuai Zon Tengah MSN Gloria James Juat
Tiong ti mega Kaban Kunsil Nengeri (ADUN) Dudong mega madah, di Sibu bisi dua iti gerempung bebasikal iya nya Swan Cyling Club enggau Kelab Berbasikal Rajang.
Iya madah, dua bengkah gerempung tu bela ngembuan raban ti aktif.
“Kitai meda enda mayuh sida ke bebasikal ditu ngembuan juluk ati deka nyadi orang ti landik ba pengawa bebasikal nyentuk ulih besemekih ba pekit renggat ke tinggi.
“Nya alai, aku minta dua buah gerempung basikal tu ransing matih raban sida lalu nyilih pengawa nya ari dikereja rindu ati nyadi sebengkah batang pengawa, nyadi atlet bepekit enggau orang,” ku iya nambah baru.
Dulu agi ari tu, Hii ba jaku iya madah, program sehari nya diatur begulai Perbadan Sukan Sarawak (SSC), Kaunsil Lumba enggau Main Nengeri Sarawak (MSNS) enggau Opis Residen Sibu ti sebengkah ari chara sitak tu napi Sukan Sarawak (SUKSAR) 2017 ti deka diatur 14-17 Disember ke deka datai.
Ku iya, bebasikal sebengah ari 14 pekit deka diatur maya SUKSAR tu ila alai empatbengkah zon deka besemekih.
Athlet ari Sibu, Kapit enggau Mukah deka begempung dalam Zon Tengah.
“Ketegal nya, ba program sehari tu, kitai belabuh enggau ‘Speed and Skills Tests’ ke diatur ba Dataran Bandar Sibu tumu pagi tadi (kemari),” pia ku iya madah.
Hii mega madah, tuju bukai program nya diatur laban deka nempa pengerindu ba pengawa lumba bebasikal, nyidi pengelandik ba main nya, mantaika chara ti likun main nya, ngelakuka bebasikal nyadi sebengkah kereja kelimpah mantaika SUKSAR 2017 ngagai mensia mayuh.
Enti perengka guna bisi sereta chukup, kitai di Sibu mega ulih ngangkat sereta matih sida ke landik ba pengawa bebasikal nyentuk nyadi atlet. Datuk Tiong Thai King Chairman SMC