53 iku pekekun mit ngarika PRB udah nerima surat PMR
LUNDU: RISDA Nengeri Sarawak kemari nyuaka surat chiri Pemaju Masyarakat RISDA (PMR) ngagai 53 iku pekebun mit ti ngarika empat bengkah Opis RISDA Pelilih Menua (PRB).
Surat chiri disua Sapit Menteri Pemansang Menua Pesisir enggau Kandang Menua Datuk Alexander Nanta Linggi rambau Konvensyen GAP 2017 ke diatur di Kem Bina Negara Sampadi di Lundu.
PMR nyadi orang ke mantu pekebun mit ngambi nyaup ngelempung tanggungpengawa perintah ngemujur program pemansang ke diatur RISDA.
“PMR nyadi jematan entara RISDA enggau pekebun mit ke alai sida nyadung penerang ke beguna kelebih agi ba pekara ke bekaul enggau pengawa bekebun,’ku Nanta rambau bejadi konvensyen.
Nitihka penerang ari Nanta, PMR dibayar elawin RM800 sebulan lalu sida meseti bisi ngadu enda kurang ari 10 bengkah pengawa dalam kandang sebulan.
Ba taun 2017, RISDA bisi nyendia agih belanja RM488,800 dikena mayar elawin PMR.
Seiku PMR ari PRB Samarahan Davis ak Dresa ngasai kerejasama begulai enggau RISDA kenyau 5 taun ke udah meri pengelantang ari sukut penatai pemisi ngagai ruang bilik.
Dikerandau rambau konvensyen kemari, iya ke asal ari Selepong, Sri Aman madah tanggungpengawa sida numpu ba pengawa mantu pekebun mit.
“Kitai nyendia embing ngagai pekebun mit kelimpah ti meri paung getah enggau baja ke diambi ari RISDA.
“Pengawa tu meri pengelantang lalu pia mega mai penatai pemisi,’ ku iya ke mega bisi numbuhka kebun getah di Lachau enggau di Selepong, Sri Aman.
Ba pengawa kemari 11 iku PMR ari PRB Samarahan bisi nerima surat chiri, PRB Miri (11), PRB Betong(14) enggau PRB Sibu (17). KUCHING: Naka pukul 5 lemai kemari, penyadi ampuh bah ke bisi nyadi ba sekula di nengeri tu udah surut magang lalu sekula deka bejalaika sesi belajar enggau ngajar baka selama, Hari Satu (21 Ogos 2017).
Pekara nya dipadahka Sekretariat Komiti Mutarka Penusah Ngenyit Nengeri ( JPBN) Sarawak nengah penerang berita, kemari.
Dibandingka naka pukul 8 pagi kemari, Opis Pelajar Nengeri Sarawak dalam penerang berita ke dikeluarka JPBN ngeriputka bisi sebuah sekula agi ditutup iya nya SK Ng Kain, Kapit ti mungkur 61 iku orang.
Nambahka nya penerang berita nya madahka gaya hari di Sarawak berengkah pukul 4.30 lemai kemari dipelabaka ujan semina nyadi di Kuching lalu kandang menua bukai di Samarahan; Serian; Sri Aman; Betong; Sarikei; Sibu; Kapit; Mukah; Bintulu; Miri enggau Limbang dipelabaka nadai ujan.