Lim Ah Teck ’ Tokoh Amalan Pertanian Baik’ 2017

LUNDU: Nengah kerejasama enggau RISDA Nengeri Sarawak kenyau ari taun 2011, penerima gelar ‘Tokoh Amalan Pertanian Baik (GAP)’ 2017, Lim Ah Teck (gambar) nyadang teulihka asil getah taun tu.

Lim ke penatai asal ari Rh Banggau, Kemintin Klauh, Sri Aman madah lebih 800 pun getah iya ke manggai umur lima taun diatu udah sedia ditangkal.

“Aku ngadu kerejasama enggau RISDA Sarawak nengah program GAP ‘tanam semula’ getah kenyau ari taun 2011.

“Nengah program tu mega aku bisi nerima bantu paung getah enggau baja lalu ba taun tu, semua pun getah udah tau ditangkal,” ku iya.

Lim mansutka jaku nya pengudah nerima gelar Tokoh GAP 2017 ba konvensyen GAP RISDA Sarawak 2017 ke diatur di Kem Bina Negara Sampadi, Lundu kemari.

Gelar nya disua Sapit Menteri Pemansang Menua Pesisir enggau Kandang Menua Datuk Alexander Nanta Linggi ke alai dulu agi ari nya iya udah bejadi konvensyen.

RISDAnengahprogramGAP ‘tanam semula’ getah bisi nyendiaka bantu belanja RM13,500 ungkup sehektar tanah.

Kelimpah ari nya, Lim, 65, mega bisi nerima embing enggau latih ari RISDA ba pengawa nanam sayur.

Ungkup pengawa nya iya nerima bantu RM10,000 ari RISDA ke alai diatu pemisi ari asil sayur ninting bulan manggai RM3,000.

Sayur iya dijual di pasar Sri Aman kelimpah diangkat sekeda pemurung.

Lim ke ngembuan tanah NCR pemesai 12 hektar enggau tanah bepala pemesai 4.5 hektar bisi mega numbuhka kebun sawit.

Tanah pemesi 1.5 hektar iya diungkup ba pengawa ‘tanam semula’ getah, kebun sawit 12 hektar enggau pegung ikan 0.8 hektar.