Asil randau PM, PG meri pemaik ngagai semua piak

Komiti deka mantaika pekara ke udah dikerandau ngagai Kepala Menteri enda lama agi, ku Uggah

KUCHING: Asil randau ke udah diadu Komiti Pemakai Menua (PM) enggau Pulau Galau (PG) deka dibantai ngagai Kepala Menteri Datuk Amar Abang Johari Tun Openg enda lama agi.

Pekara tu dipansutka Sapit Kepala Menteri ke mega Chairman komiti nya Datuk Amar Douglas Uggah Embas ba pengerami ngelanchar Skim SALCRA Arip- Bawang- Tau, di Rh. Lukok Munyi,Sungai Bawang Balingian, Selangau kena Hari Enam tu tadi.

“Komiti ti bechairmanka aku udah ngadu sekeda aum ke alai asil aum nya deka dibantai ngagai Kepala Menteri ngambi ulih tetemuka jalai mutar isu ke bekaul enggau Pemakai Menua sereta Pulau Galau.

“Kitai udah nguji ngadu ke pemadu manah, isu tu meseti diputar enggau lurus sereta manah, berundingka semua sukut ngambi ulih meri pemaik ngagai rayat enggau perintah,”ku iya.

Uggah ke mega Menteri Betanam Betupi Moden, Tanah Adat enggau Pemansang Kandang Menua sebedau tu kala madah diak asil randau deka disua ngagai Perintah Nengeri sebedau pengujung taun tu.

Komiti ke ditumbuh ba pun taun tu nya bejalaika pansik ke mungkur pekara sejarah enggau adat tanah NCR enggau silik sebedau riput nya disua ngagai Kepala Menteri.

Ngenang kaul ke sama, Uggah madah Perintah Nengeri deka majakka pengawa nyukat tanah NCR nengah Seksyen 6 Kanun Tanah Negeri (Rizab Guna Sama Bumiputera) ba taun tu.

“Taun tu agih belanja RM30 juta disedia ungkup pengawa nyukat tanah NCR nengah Seksyen 6 (Kanun Tanah Negeri) lalu deka ditankanka enggau Seksyen 8.

“Rayat enda patut irau ketegal perintah enda deka ngerampas tanah ke disukat nengah Seksyen 6 munyika tuduh sekeda orang ke alai surat pala tanah nengah Seksyen 18 deka diberi,’ku iya.

Ku Uggah, Sarawak bisi urung 1.5 juta hektar NCR lalu ari penyampau nya 1.12 juta hektar udah diakun nyadi tanah NCR, kelebih dike- mansang SALCRA (Lembaga Penyatuan dan Pemulihan Tanah Sarawak).

Naka ke diatu Uggah nambah, 700,000 hektar tanah NCR udah disukat nengah Seksyen 6 Kanun Tanah Negeri lalu ari penyampau nya, lebih 500,000 hektar udah digizit.

“Rakyat tau meresa, nadai tanah ke disukat nengah Seksyen 6 bisi diambi perintah, tuju kitai nyukat nengah Seksyen 6 iya nya perintah deka ngakun tanah NCR nengeri tu,’ku iya.

Kitai udah nguji ngadu ke pemadu manah, isu tu meseti diputar enggau lurus sereta manah, berundingka semua sukut ngambi ulih meri pemaik ngagai rayat enggau perintah. Datuk Amar Douglas Uggah Embas Sapit Kepala Menteri Sarawak