K1M diperansang ngena media rama ngerembaika pemujur digaga perintah
KUCHING: Raban Komuniti 1Malaysia (K1M) diperansang ngena media rama baka Facebook dikena ngerembaika berita pemujur ke digaga perintah ngagai mensia mayuh.
Direktor Opis Pemadah Sarawak, Abang Sardon Abang Hashim madah Opis Pemadah begunaka servis sukung ari raban KIM, mantu opis nya bekunsika penerang ngagai komuniti.
“Dalam jeman media rama kemaya hari tu, aku bisi udah minta Opis Pemadah madah ngagai raban KIM muka akaun Facebook, ke digaga nyadi endur mantaika penerang.
“Kami udah ngasuh urung 235 KIM di Sarawak, pengabis kurang pan buka seiti akaun Facebook dulu, ke diputar seiku pegawai pengatur. Nya alai, sigi patut raban K1M ngembuan akaun FB, ngambika sida ulih bekunsika penerang,” ku iya.
Abang Sardon madah munyi nya lebuh bejaku ba atur pengawa ‘Jalinan Kasih P.195 Bandar Kuching’ ti diatur ulih Opis Pemadah di sebengkah hotel ditu, kemari.
Iya mega madahka, iya madah munyi nya laban diperatika KIM di serata menua ukai semina di Sarawak aja, tang nyengkaum di Semenanjung nyauka 2,000 KIM di serata menua tu, nyerumba sebuah gerempung ke ulih mai mayuh ubah.
“Tang mayuh ubah ke digaga di serata menua mayuh muakka ubah fizikal.
“K1M diatu diperansang bedagang, bejualka mayuh macham produk ari menua tu empu, tang taja pia, anang kelalu gagit bejual sampai enda ingat bekunsika penerang ngagai komuniti,” ku iya.
Pengawa raban K1M ku iya tau diserumba baka ‘Pengarang Berita Komuniti’ laban tiap iku sida ke ari KIMK nya, nyadi pengarang berita enggau gaya sida iya empu.
“Ambika chunto baka bisi orang nikah ba Kpg Lumba Kuda, mayuh agi ke nyadi ‘ pengarang berita’ tauka ‘jurufoto’ ari ke amat-amat, laban pemisi telefon pintar.
“Media rama Facebook tau nyadi palan ke kitai bekunsika penerang lalu ke batang, ke mensia mayuh kekunsika pemadah ba endur sida iya. Sida iya tau bekunsika penerang pasal ampuh bah, rabies, bebadi sereta mayuh macham penusah bukai.
“Ambika chunto, enti bisi jalai ke belubang, ke seruran ngasuh tayar orang pechah, tau dikunsika ba Facebook, lalu udah nya ‘screenshot’ gambar nya lalu dianjung ngagai Opis Kereja (JKR),” ku iya, lalu nambah Kepala Menteri Datik Amar Abang Johari Tun Openg enggau Menteri Opis Kereja Dato Sri Fadillah Yusuf, entara pemesai ke jampat nimbal sebarang tanya komuniti.
Nangkan Abang Sardon, Sekretari Politik di Opis Kepala Menteri, Tan Kai, ke ngarika Menteri Opis Kaunsik Kandang Menua enggau Menteri Pengawa Berumah, Datuk Prof Dr. Sim Kui Hian, dalam jaku iya madahka OPis Pemadah patut beratika pengawa ke nyadi (on the ground).
“Beratika pekara ke berat ba ati pengundi, taja pan orang ke amat-amat ari Kuching nyau nadai diau di bandaraya tu agi tang bepindah ke Samarahan, Matang tauka Batu Kawah. Nya ke diperatika kami maya bekimpin suba,” ku Tan Kai.
Kelimpah ari nya, iya madah maya agi bisi ex-Kepala Menteri, niang datuk Patinggi Tan Sri Adenan Satem (Tok Nan) suba, Sarawak mujur teulihka tiga hari ke ngelaika 22 Julai (Hari Kemerdekaan Sarawak), 31 Ogos ( Hari Malaya) enggau 16 Sept Hari Malaysia,ku iya.
“Ku kami, 22 Julai nya, hari pengada Sarawak, 31 Ogos hari pengada Malaya, lalu 16 Sept Hari Tikah Malaysia. Enti bisi Hari Tikah, kitai enda tau enda ngetanka tikah kitai nya, anang kitai nyau beserara. Suba, Singapore udah nyeraraka diri.
“Kitai enda tau enda bebendar agi gawa ngambika enda sarak, enda tau enda bebasaka pangan diri. Umbas agi besebutka Sarawak deka pansu ari Malasia,” ku iya.
Rayat Sarawak ku iya, enda tau enda diau dalam sebuah ruang bilik, ke betatika pekara ke patut di empu ulih Sarawak baka autonomy menua tu, Tekad Ai Bakun udah engi kitai, sekula ke udah lama sereta jai patut diganti baru, angkatka Jaku English, sereta mayuh macham pemansang ke dipajakka Kepala Menteri kediatu, Datuk Amar Abang Johari Tun Openg,” ku iya.
Sama bisi enggau ngulu atur pengawa nya kemari, Ketuai Pemuda Parti Sa’ati Rayat Sarawak, Milton Foo, enggau Sapit Direktor Opis Pemadah Sarawak, Ali Suhaili.
Ba atur pengawa nya kemari, urung 20 iku expengereja pengawa ba Opis Pemadah Sarawak ke udah bepinchin sama bisi9 dibai ngagai atur pengawa nya, alai sida iya mega bisi nerima setipikit pengelama udah gawa enggau opis nya.