Projek SALCRA ba Arip, Tau enggau Bawang pemeri besai ari perintah
KUCHING: KaunsilPengempung enggau Pengintu Tanah Sarawak (SALCRA) deka ngemansang kebun sawit ba tanah pemesai 6,000 hektar di Arip, Tau enggau Bawang, di Selangau.
Sapit Kepala Menteri Datuk Amar Douglas Uggah Embas madah Perintah Nengeri bisi ngemendar agih belanja RM110 juta ungkup projek nya.
Ku iya, projek pemansang nya nyadi sebengkah projek ubah menua pesisir ke diadu Perintah Nengeri ngambi ulih ngangkatka ikas pengidup peranak di menua pesisir enggau kandang tebing tasik Sarawak.
“Sehari tu aku enggau raban bukai ke datai bisi mai berita manah, SALCRA deka ngemansang tanah di Arip, Tau enggau Bawang, urung 6,000 hektar.
“Perintah Negeri udah ngemendar agih belanja RM110 juta…Seiti pemeri ke besai ari Kepala Menteri Datuk Amar Abang Johari Tun Openg tajapan iya nadai datai sehari tu.
“Kami ti ngarika iya deka mai pemansang kitu ngambi peranak ke nguan menua tu enda tinggal ari pekara pemansang,”ku iya.
Iya mansutka jaku nya ba pengerami ngelanchar Skim SALCRA Arip-Bawang Tau di Rh. Lukok Munyi , Sungai Bawang Balingian Pelilih Selangau kena Hari Enam tu tadi.
Bela datai Menteri Utiliti Dato Sri Dr Stephen Rundi Utom, Menteri Muda ba Opis Kepala Menteri (Undang-Undang enggau Adat Bumiputera) Datuk John Sikei Tayai , Manager Besai SALCRA Datu Vasco Sibat Singkang enggau Penyanding Penemu Pansik Sains Sarawak Datuk Patinggi Tan Sri Alfred Jabu Numpang.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah Perintah Barisan Nasional (BN) seruran ngiga jalai dikena ngangkatka ikas pengidup rayat di menua pesisir lalu seiti chara iya nya ngemansang Tanah Adat Bumiputera (NCR).
“Peranak di menua pesisir tauka di kandang tebing tasik Sarawak ngembuan mayuh tanah tang enda ngembuan modal sereta peneleba enggau pengelandik ngemansangka tanah nya.
“Ketegal nya, sekeda chara udah dituku, baka ke program nanam baru sawit SALCRA,” ku iya.
Uggah ke mega Chairman SALCRA nambah, kenyau ditumbuh ba taun 1976 betuaika Jabu, ijinsi Perintah Nengeri nya udah ngemansang 52,000 hektar NCR ungkup kebun sawit ti mungkur urung 21,000 penyereta.
Dalam timpuh nya ku iya, SALCRA udah ngeluar 15,000 surat pala tanah nengah Seksyen 18 Kanun Tanah Negeri ngagai penyereta.
Iya madah kenyau 1976 nyentuk ngagai diatu SALCRA udah ngagihka lebih RM800 juta dividen ngagai penyereta.
“Tanah ti dikemansnag di Arip, Tau enggau Bawang dikereja nengah Seksyen 6 Kanun Tanah Negeri iya nya Rizab Guna Sama Bumiputera ke udah digizit lalu pengudah dikemansang SALCRA, pala tanah nengah Seksyen 18 deka diberi.
“Reti nya tanah tu enda diletak premium lau diempu seumur idup, nengah penetap enda dijual ngagai orang bukai,”ku iya seraya madah Perintah nadai kala ngerampas tanah NCR rayat pengudah disukat nengah Seksyen 6 Kanun Tanah Negeri.
Ba pengerami nya, Uggah ngagihka RM18,000 ngagai Rh. Lukok Munyi enggau RM3,000 ngagai Biro Wanita rumah panjai nya.
Iya mega madah SALCRA setuju ngagaihka RM350,000 dikena ngemanah jalai enggau balai mayuh guna diak.
“Datuk Joseph Entulu (Kaban Parlimen Selangau) sebedau mupuk ke Kuala Lumpur tadi ngasuh aku madah diak iya bisi ngagihka RM100,000 ungkup projek di rumah panjai tu,’ku iya.