Kawin tumu semina nambahka penusah
Runding nya patut diubah laban tu ukai chara engkeman mutarka penanggul rama
LONG BEDIAN, Baram: Kawin tumu ba umur ti agi biak kelebih agi di kandang menua ulu baka Baram lalu ba komuniti Penan ukai chara ti engkeman dikena mutarka penanggul rama tang deka terus ngasuh sida idup dalam penyeranta.
Ulih tauka enda sida ngidupka diri pengudah nirika rumah tangga sereta melanja bala anak diri ila, laban sida agi diau begulai enggau apai indai sereta bedau ulih tetupika diri empu. Dennis Ngau ADUN Telang Usan
Kaban Kunsil Nengeri (ADUN) Telang Usan Dennis Ngau madah, endang ukai pekara ti ulih diseliahka pengawa tu (kawin) nyema deka ngepunka ruang bilik diri empu pengudah badu besekula kelebih agi ba bansa Penan.
“Ulih tauka enda sida ngidupka diri pengudah nirika rumah tangga sereta melanja bala anak diri ila, laban sida agi diau begulai enggau apai indai sereta bedau ulih tetupika diri empu,” ku iya.
Dennis mansutka jaku nya rambau pengawa nutup ‘ Program Kesejahteraan Sosial Remaja, Katakan Tidak Kehamilan Remaja – Sayangi Keluarga, Hindari Seks Bebas dan Dadah agar terhindar dari HIV/AIDS’ ke diatur Opis Pengintu Pengelantang Mensia Mayuh (JKM) Sarawak di Sekula Sekondari ( SMK) Long Bedian kena 17 enggau 18 Ogos tu tadi.
Nya alai iya nyemetak madah, raban nembiak patut nyikap diri ngena penemu enggau peneleba dalam pengawa dulu sebedau mutuska diri deka belaki tauka bebini.
Pia mega ku iya, pengawa nampung pelajar maya sida udah belaki tauka bebini mega ukai pekara ti muntang, laban sida deka ngemeratka ruang bilik diri dulu kelimpah ari pelajar.
“Ba pekara tu, apai indai enda patut nejuka bala anak sida belaki tauka bebini pengudah tembu sekula tauka enda mujur nampung pelajar.
“Tebal agi bala nembiak ti belaki tauka bebini tumu tu pengudah tembu Pom Tiga ketegal enda ulih nampung pelajar laban enda pas tauka penanggul ke bukai. Aku ngelalau sida anang putus pengarap tang ngiga awak ke bukai dalam pengelandik ngambika bisi pengidup ti menyana agi,” ku iya.
Ku iya, enda pas dalam pelajar ukai reti jalai sida naka nya aja laban sida ulih ngaul mayuh bidang ke bukai nyengkaum pengawa betanam betupi, betukang enggau pengawa dagang.
Iya mega ngingatka bala nembiak nyeliahka diri ari dadah enggau ngereja ulah enda menuku ti tau ngasuh sida tusah laban semua nya deka nekul sida ari bulih pengidup ti menyana.
Ku iya, pansik ari polis madahka ulah makai dadah udah ngelekai ngagai kandang menua ulu enggau menua pesisir nyengkaum Telang Usan enggau Baram.
“Tu semina deka nganchurka ruang bilik enggau komuniti nya empu,” ku Dennis nandu.