Program Nuchuk Vaksin deka disambung 22 Ogos
KUCHING: Program Nuchuk Vaksin ngagai jelu deka disambung baru kena hari Dua tu (22 Ogos) di lima buah genturung pendiau ba sitak Serembu.
Nitihka ripot, penyampau jelu ke udah dituchuk vaksin, di serata nengeri, manggai 32,644 iku lalu ari penyampau nya, 25,002 iku ukui, 7,597 (mayau) sereta 45 (jelu bukai).
Komiti Mutarka Penusah Ngenyit Sarawak madahka Opis servis Veterinari Sarawak (JPVS) bisi bejalaika pengawa sida nasat kes bekait enggau Rabies.
Penyampau ari tasat nya, tetemuka urung 36,816 survelan aktif lalu 962 survelan pasif. Tu dikena nagang penyakit Rabies nya ngerampit udah digaga JPVS di bagi menua Serian, Kuching enggau Sri Aman.
Berindik ari nya, urung 210 sampel ke di ulih ari Bagi Menua Kuching, Sri Aman, Serian, Samarahan, Betong, Sarikei, Sibu enggau Miri bisi dianjung ngagai VRI di Ipoh, ngambika ulih diperesa sekalika positif virus Rabies.
Ari penyampau nya bisi 192 sampel (ukui), 17 (mayau) enggau seiku (semawo).
Naka kediatu, 36 sampel ukui enggau 6 sampel mayau ari 180 sampel ke diterima, datai ari Bagi Menua Kuching, Serian enggau Sri Aman dipadahka positif.
Pengawa bejalaika operasyen begempung entara Opis Pelilih begulai enggau JPVS naka kediatu udah beratika pemayuh ukui siga majak nambah lalu dikena nagang penyakit Rabies tu ngelekai, sida udah nangkap urung 1,129 iku ukui siga di Bagi Menua Kuching, Serian, Sri Aman, Sarikei, Samarahan enggau Betong.
Ba kenang ke bukai, Opis Pengerai Sarawak (JKNS) mega bisi madahka urung 19 kes udah ditemu bisi kena ketup ukui. Naka kemari, bisi 7 kes ketup ukui di Serian, 3 kes (Sri Aman), 8 kes (Kuching) enggau siti kes di Samarahan, lalu penyampau semua kena gigit jelu ari 1 April tu tadi datai ke seharitu manggai urung 2,728 kes.
Lalu nitihka penyampau nya mega, urung 1,007 iku mensia mayuh udah dituchuk vaksin anti-Rabies.
Beserimbai enggau nya, JKNS udah meri penerang iya nya tiap kes kena ketup jelu deka diperesa lutur dulu sebedau ditetapka bekau ketup nya patut diberi vaksin tauka enda.
JKNS ngelalau mensia mayuh ke udah kala kena ketup ukui dalam kandang 1 April 2017 datai kediatu, di pinta lengkas beperesa ba klinik besemak enggau sida.