ACSJ pelasar pemadu manah alai nengkebang lagu, tiun ke bekualiti
KAPIT: Kaban Parlimen ( MP) Ulu Rajang, Datuk Wilson Ugak Kumbong madahka Anugerah Carta Sapa Juara (ACSJ) nyadi pelasar pemadu manah ngagai bala artis menua tu, kelebih agi komuniti Dayak, bepekit enggau pangan diri nengkebang lagu enggau tiun ti bisi kualiti.
“Lagu enggau tiun tu nyadi industri chukup besai dikena ngulihka penatai pemisi kelimpah ulih mekit pangan diri,” ku Ugak lebuh bejadika ACSJ Ke-4 diatur nyerumba Pesta Kapit 2017 di Padang Bilun Lama ditu, lemai Hari Enam tu tadi.
“ACSJ nyediaka awak sereta peransang ngagai bala komposer nengkebang manah agi lagu ngambika ulih bepekit. Kitai udah jauh tinggal di belakang ari dunya pemerindang di Semenanjung Malaysia.
“Nya alai, kitai meseti ransing agi meransang diri ngaga lagu enggau tiun ngambika dibayar setipak enggau pe- manah kualiti,” ku Ugak nerang.
Lagu Iban endang tebilang ngagai peranak Sarawak. Kitai bisi penau lalu penau tu patut dikena dalam ngeluarka lagu enggau tiun ti bisi kualiti, ku Ugak.
Ugak enggau Jamit bela nyuaka tepa ngagai kesemua 18 iku pesereta renggat semifinal ti ngambi bagi dalam pekit nya.
Pekit ACSJ diatur urung pukul 5 lemai, Hari Enam, lapan iku ari 18 pemekit udah dipilih ngagai renggat kepenudi ti deka diatur di Betong dalam bulan baru.
Lagu enggau leka lagu ari digaga Jesley Jabu enggau Mathius Mambang ti benama ‘Padamka Nama aku’, Maxwell Taju Remaong (Kemarau Pengerindu), Lesley Ugil (Tinggal Kenang), Romy Majestica (Ais Ati), Depha Mp (Seiku Dalam Seibu), Francis Basat (Perasa Ketegal Danji), Francis Alvin (Pengerindu Aku Enda Bebagi) sereta Henry Usup enggau Embat Lala (Nujah Duri Menasan Puntan).
Sekeda ari bala temuai dipebasa bisi datai Kaban Kunsil Nengeri ( ADUN) Bukit Goram Jefferson Jamit Unyat, Sekretari Politik Kepala Menteri Sarawak Nicholas Kudi Jantai, Residen Kapit Joseph Belayong sereta bala bukai.