Ketuai komuniti patut ngembuan mayuh penemu, pengelandik
Ngemuntangka sida mutarka penanggul, ngatur program
SRI AMAN: Tetiap iku tuai rumah tauka ketuai raban bansa di renggat keterubah patut ngembuan mayuh penemu dalam bemacham bidang ti ulih nyadika lalau sida ngatur pengawa.
Kebuah pia laban nengah penemu ti dikembuan, ulih dikena ngangkatka tikas pemanah pengidup bala nembiak redak sida, pia ku Sapit Menteri Dalam Menua Dato Masir Kujat.
Masir ke mega Kaban Parlimen ( MP) Sri Aman mansutka jaku tu lebuh bejaku bejadika Bekal Ai Graviti Sunga Ai bepalan di Rumah Achin, Sunga Ai, Sri Aman bedau lama.
Iya nyemetak madah sida ti udah dipilih nyadi tuai rumah tauka ketuai raban bansa meseti bejalaika pengawa memanah, bisi tanggungpengawa, lurus sereta enda bechiping ngambika tetiap agenda pemansang ti dilangkar perintah ulih dipejalai enggau manah pulaika pemaik rayat.
“Nyadi tuai rumah tauka ketuai raban bansa, sida patut gawa begulai enggau nembiak redak sereta bekunsika tetiap penanggul lalu ngiga jalai mutar pemadu manah nentuka pengelantang enggau pengelikun ke bisi enda dikeruga.
“Reti nya, sida patut nemu tetiap penanggul ke bisi nyadi lalu anang sesekali ngelalaika penanggul nya ari ditemu nembiak redak, laban nyema iya enda diputar, tentu deka meri pangka negatif ti tau ngasuh diri empu enggau nembiak redak napi penusah,” ku iya nandu.
Kelimpah ari nya, tetiap iku tuai rumah enggau ketuai raban bansa diperansang
Nyadi tuai rumah tauka ketuai raban bansa, sida patut gawa begulai enggau nembiak redak sereta bekunsika tetiap penanggul lalu ngiga jalai mutar pemadu manah nentuka pengelantang enggau pengelikun ke bisi enda dikeruga. Dato Masir Kujat Sapit Menteri Dalam Menua
ngaul rat bemacham ejensi perintah ngambika penanggul ke bisi nyadi ulih diputar. Pia mega, sida patut nemu ngena servis enggau bantu ti udah disediaka ejensi perintah dikena mutarka penanggul ke nyadi.
“Bala tuai rumah enggau ketuai raban bansa patut muai ulah malu betemu enggau ejensi perintah sereta anang ngelalaika penanggul ke bisi nyadi ngambika perintah ke bisi ulih nyaup sida mutarka iya.
“Tetiap ejensi perintah ke bisi nyadi ejensi ngemuntangka pengawa rayat, nya alai bala tuai rumah enggau ketuai raban bansa patut mereti sereta ngena servis enggau bantu ti disedia enggau memanah,” tandu iya.
Iya mega andal amat ejensi perintah seruran gawa sereta mantu mutarka penanggul ditapi rayat kelebih agi ngaul isu pemansang.
Sama bisi datai pengari Kaban Kunsil Nengeri ( ADUN) Bukit Begunan, Datuk Mong Dagang, Jesi Bintoh Suntek sereta bala ketuai raban bansa ke bukai.
Berebak enggau nya, Masir bisi ngagihka belanja penyampau RM20,000 ngagai Biro Indu Rumah Achin, Sunga penyampau RM20,000 seraya RM5,000 da agi ungkup Serakup Sunga Ai.
Nangkan nya, Mong mega bisi ngagihka RM 7,000 ngagai JKKK Rumah Achin seraya bela penyampau RM 7,000 ngagai JKKK Rumah Elly enggau JKKK Rumah Perie, Sunga.