Voucher Uniform Sekula diberi bepelasarka nama dalam program E-Kasih
BARAM: Apai indai ke bisi anak nadai nerima bantu Voucher Uniform Sekula ari Yayasan Sarawak dilalau anang ngemesaika pekara tu.
Kaban Kunsil Nengeri (ADUN) Telang Usan Dennis Ngau madah, program meri voucher tu digaga bepelasarka rintai ke bisi dalam program E-Kasih lalu ukai digaga enggau bechiping ari sekula tauka Yayasan Sarawak.
“Enda alah diberi ngagai lebih ari 20,000 nembiak sekula di selampur nengeri tu ngena agih belanja RM4 juta ungkup program tu.
“Beserimbai enggau nya, aku ngarapka apai indai nemu lalu enda bechekih bekaul pekara tu ti madahka kebuah anak sida enda nerima bantu voucher ungkup ke taun tu. Sida ti nyadika tu seiti isu ke madahka pekara tu digaga bechiping endang enda patut laban agih belanja nya enda mayuh,” ku iya bejaku rambau pengerami nyuaka Voucher Uniform Sekula ngagai 49 iku nembiak sekula ari enam buah sekula di Telang usan, Baram bedau lama.
Dennis nambah, enam buah sekula nya Sekula Primari (SK) Long Bedian, SK Long Atip, SK Long Kevok, SK Long Loteng, SK Long Bemang enggau SK Long Wat.
Iya nambah, bantu nya udah mandangka komitmen ti tinggi perintah nengah Yayasan Sarawak ti bebendar deka mantu nembiak sekula ti endang patut nerima.
Ari baru program tu, tetiap nembiak sekula ke nerima voucher sepenyampau RM200 dikena meli uniform sekula di selampur nengeri.
Dennis mega mesan sida ti nerima voucher enda ulih nganti enggau mata duit, berindik ari nya apai indai patut nyediaka duit tambah nyema ungkus meli uniform nya lebih ari penyampau voucher nya.
“Aku ngarap bantu tu ulih ngelempungka tating belanja apai indai seraya meri peransang ngagai anak sida belajar bebendar,” ku iya.
Sama bisi datai ba pengerami nya ti digaga ba Balai Komuniti Long Bedian iya nya pegawai tadbir Ezra Uda enggau Sapit Pemesai Pelajar Marudi Jalong Wan.