Tanggungpengawa PIBG nyungkak penyulut sekula
Nengah kerejasama rat entara pengajar enggau apai indai deka nentuka juluk sekula nyulut ulih dijapai, ku Masir
SRI AMAN: Sapit Menteri Dalam Menua, Datuk Masir Kujat madahka Gerempung Apai Indai enggau Pengajar (PIBG) nyadi gempung ti engkeman enggau beguna endar ba pemansang sesebuah sekula.
Nitih ku iya, enda ulih disakal pengawa enggau tanggungpengawa PIBG di tiap sekula meri empas ba pemansang enggau penyapai sekula laban PIBG nyadi penyambung ngagai kuing enggau juluk sekula ba pekara penyulut pelajar sereta atur pengawa PIBG ti manah deka nempa sekula ti pegari nama.
“Nya alai aku minta kitai begempung sereta meri buah runding ngemensangka PIBG nentuka penyulut pelajar bala anak kitai. Pekara penyerakup bala kaban endang beguna endar ngambika sesebuah gempung ulih gawa sereta meri buah runding ti tau ngasuh nyapai penyulut ti ngemegah.
“Penyulut tetiap gerempung tauka serakup endang bepanggai ba sekeda pekara ti patut dipejalai begulai,” ku iya.
Iya ke mega Kaban Parlimen (MP) Sri Aman mansutka jaku nya lebuh bejadika Hari Begempuru PIBG Sekula Primari (SK) Melugu, Sri Aman semak ditu.
Ku iya, juluk dalam polisi pelajar endang ngemeratka penemu enggau pengidup dudi hari. Nya alai, dikena nyapai tuju enggau juluk pelajar ti dikedeka kitai, seiti ari strategi ti ulih dipejalai iya nya ngempitka kaul sekula enggau apai indai nengah PIBG.
“Tanggungpengawa enggau pemanah tanggam kaul antara apai indai, pengajar enggau komuniti patut seruran bisi sereta tegap. Kaul enggau kerejasama tu deka nempa serakup ti bepanggai enggau pangan diri ngambika
Nya alai aku minta kitai begempung sereta meri buah runding ngemensangka PIBG nentuka penyulut pelajar bala anak kitai. Pekara penyerakup bala kaban endang beguna endar ngambika sesebuah gempung ulih gawa sereta meri buah runding ti tau ngasuh nyapai penyulut ti ngemegah. Datuk Masir Kujat Sapit Menteri Dalam Menua
sekula nyapai penyulut,” ku iya nyemetak.
Kelimpah ari nya, PIBG mega ulih nyadi peransang ngagai kaul rat opis perintah enggau Gerempung Ukai Dikuasa Perintah ( NGO), nempa kaul enggau bekunsika penemu ti pulaika pemaik semua.
“Penanggul rama kemaya hari balat ngirauka ati kitai semua. Penanggul rama enggau ulah enda menuku ti ngaul bala nembiak sekula endang ngasuh kitai irau. Mayuh pun pekara ngasuh utai tu nyadi. Kitai enda patut bela ngelempaika penyalah ngagai sebarang piak.
“Nya alai, penanggul tu patut diperundingka semua piak. Ba tu mih tanggungpengawa PIBG bela begulai enggau piak sekula. Pelajar moral enggau nerenakka pemanah ulah, penyayau sereta penetao diri sereta nilai modal mensia patut diiri ngagai bala anak ngambika ulah enda menuku ulih diseliah ari pun,” ku iya nerang silik.
Nangkanka nya ku iya, PIBG di sekula patut chakah agi gawa sereta ngelangkar ngambika pemisi iya ulih bejalaika pengawa ti menyana agi ba penyulut ti dikearap.
“Penemu enggau kereja ti nyulut patut diterebak ngambika PIBG terus relevan sereta nyadi gempung besai gawaka penyulut pelajar bala anak,” tandu iya.
Sama bisi datai Kepala Pengajar Loius Aom sereta bala pengajar ke bukai.
Berebak enggau nya, Masir mega bisi ngemendarka agih belanja penyampau RM 50,000 ngagai SK Melugu ungkup taun 2018 dikena bejalaika aktiviti sepanjai taun sida.