PBDSB: 80 peratus nembiak bansa Dayak enda nembuka sekula
KUCHING: Parti Bansa Dayak Sarawak Baru (PBDSB) udah tetemuka statistik ripot ti digaga United Nation (UN) dalam taun 2005 ti mandangka mayuh nembiak Dayak ngemaduka diri ari sekula, sekula primari enggau sekondari.
Statistik ti dibantaika UN ungkup taun 2005 nengenyitka ati laban statistik nya mantaika urung 26,000 iku badu besekula ba tikas sekula primari (Primari Satu ngagai Primari Enam) lalu 40,000 iku nembiak ke bukai ba tikas sekula sekondari, antara taun 1992 ngagai 1997. Tebal agi sida tu datai ari ruang bilik seranta di kandang menua pesisir di Sarawak lalu 80 peratus ari penyampau nya nembiak bansa Dayak.
PBDSB deka nanya ngagai perintah nengeri, baka ni UN tau bulih statistik ke bansa nya lalu ari ni sida ngulihka iya, ti ngayanka pemayuh tubuh nembiak ti badu besekula ke tebal agi ari kandang menua pesisir di Sarawak? Nama kebuah pekara serius bansa tu nadai kala disebut perintah nengeri sebedau tu?
Penyampau 80 peratus nembiak sekula bansa Dayak ari 66,000 iku ari tikas sekula primari enggau sekondari tikas kolektif endang amat serius. Nama kebuah menteri Dayak nadai kala mantaika isu berat tu sebedau tu? Sekalika Opis Pelajar tauka Opis Menteri Pelajar nemu pasal statistik nya? Bisi enda perintah nengeri ngenataika ripot statistik nya ngagai UN?
Batang tanya ditu iya nya nama kebuah nembiak sekula Dayak di menua pesisir ngempu penyampau tikas ke tinggi agi badu sekula enti dibanding enggau ke bukai? Sekalika bisi sebarang pengawa dipejalai dikena ngurangka penyampau nya sereta nyeliahka penanggul tu ari nyadi baru?
PBDSB mantaika pekara tu ukai reti deka malut pekara raban bansa tang minta saut ti patut ari perintah nengeri sereta mega opis menteri pelajar, kati UN tau dulu agi bulih penerang ke baka nya? Pekara tu chukup serius, nama kebuah kitai patut ngulihka penerang ari ripot statistik ari UN ari ke bulih ari perintah nengeri kitai empu?
Ari penerang nya, bansa Dayak jauh tinggal di belakang ba mayuh sukut hak nyadi peranak menua tu. Laban mayuh isu agi bedau diputar bekaul enggau komuniti Dayak. Isu baka tanah Adat Bansa Asal ( NCR), nadai ngembuan status peranak nengeri, infrastruktur menua pesisir ti menyana, pengelantang ba pekara ekonomi sereta mega pekara pelajar, mengkang ditapi taja udah manggai 53 taun nyentuk ke sehari tu.
Baka peranak bukai di Malaysia, bansa Dayak mega bisi hak ke sebaka nyadi peranak Sarawak sereta mega peranak Malaysia. Bansa Dayak ukai semina nyadi pengundi ti meri lebih kuasa ngagai sekeda orang dikena nentuka sida terus megai kuasa.
Tu timpuh ti mar ditapi bansa Dayak, kelebih agi di menua pesisir Sarawak diatu, laban sida agi bendar nyalak pemansang, napi pemerinsa, ngelempaika pengandal ngambika disaup, lebuh sida ti patut ngarika bansa Dayak bejaku, mengkang beratika isu ti malut bansa nyentuk ke tikas pemadu mar, tetiap kali pengawa bepilih, nabur semaya ti enda kala meri akreditasyen mutarka penanggul nya.