Uggah: Venture Capital deka diagih nitihka SOP
Puku 100 juta nya diberi KM kena mantu raban orang dagang dalam sektor betanam betupi di menua pesisir
KUCHING: Pengawa ngagihka puku mungkal dagang tauka Venture Capital (VC) ngagai orang dagang bekebun mit menua pesisir enda tau enda nitihka Standard Operating Procedure (SOP) ti ditetapka.
Sapit Kepala Menteri Menteri Datuk Amar Douglas Uggah Embas madah, puku nya deka berengkah diagih tauka dipejalaika dalam taun 2018.
Perintah nengeri ti betuaika Kepala Menteri Datuk Amar Abang Johari udah ngungkupka RM100 juta ke nyadi puku mungkal dagang dikena mantu raban orang dagang dalam sektor betanam betupi di menua pesisir.
“Kitai enda tau enda bisi SOP baka ni chara kitai ngadu belanja RM100 juta tu, laban ti pemadu beguna puku tu dikena nitihka objektif ti udah ditetapka.
“Objektif penumbuh puku tu iya nya dikena mantu ngangkatka tikas pengidup orang bumai bekebun, dikena mai sida ngemeranka pengawa betanam betupi chara moden.
“Nya alai kitai enda tau enda bisi sereta nitihka SOP chara ngaduka belanja tauka puku tu, baka ni chara milih projek lalu baka ni deka bejalaika projek, laban tu enda tau enda mujur,” ku Menteri Betanam Betupi Moden, Tanah Adat enggau Pemansang Kandang Menua nya.
Uggah mansutka pekara nya lebuh dikerandau raban pengarang berita pengudah bejadika worksyop Venture Capital ke diatur ba sebuah hotel ditu, kemari.
Pengelicha ke dikanggau bejaku ba worksyop nya kemari, Sekretari Besai, Asia Pacific Rural and Agricultural Credit Association, Bangkok, Thailand, Dr. Prasun Kumar Das ti bejuraika ‘ Building Venture Capital Fund to Promote Technology Adoption and Agribusiness Promotion in the State of Sarawak’.
Pagi kemari worksyop nya dipejalaika dikena ngiga chara bejalaika tauka ngagih sereta ngaduka puku nya enggau baka ni chara milih projek, laban objektif nya deka nentuka semua nya dipejalaika enggau mujur.
“Sehari tu bisi seraban pemesai ari sekeda opis enggau ejensi sereta seiku pengelicha bejurai sereta bekunsika modul enggau peneleba iya, lalu kitai ngarapka ba pengujung worksyop tu kitai deka bulih langkar dikena nentuka baka ni deka ngena RM100 juta.
“Kitai ngarapka ngena chara baru tu, kitai ukai semina ulih mantu ngangkatka tikas pengidup sida tang kitai ulih mai chara moden dalam industri betanam betupi nyengkaum ekonomi digital,” ku iya.
Lebuh ditanya nama pekara ti deka dipejalaika ti dikena nentuka puku mungkal dagang nya dikemeranka enggau betul, Uggah madahka kerejasama entara sektor peribit, orang betanam betupi sereta perintah deka ditempa.
“Kitai amat ngarapka ulih nempa dagang bepelasarka raban bansa nyengkaum di menua pesisir, ngambika sama numbuhka dagang sereta bejalaika dagang.
“Ti pemadu beguna dagang nya dipejalaika, bisi langgur projek, nempa kerejasama enggau sektor peribit, tu utai ke dikearapka kitai,” ku iya seraya madahka projek nya nguntungka orang betanam betupi.
Sama bisi datai kemari, iya nya Datuk Roland Sagah (Pemansang Tanah Adat) enggau Dr Abdul Rahman Ismail ( Betanam Betupi), Sapit Sekretari Perintah Nengeri (Transformasyen Sosio-ekonomi) Datu Ismawi Ismuni enggau ke bukai.
Objektif penumbuh puku tu iya nya dikena mantu ngangkatka tikas pengidup orang bumai bekebun, dikena mai sida ngemeranka pengawa betanam betupi chara moden. Datuk Amar Douglas Uggah Embas Sapit Kepala Menteri Sarawak