Chalun BN patut negutka kaul enggau pangan diri
Tu mandangka parti nya ulih ngembing enggau ngetanka pemanah kaul entara rayat pupu bansa
SIBU: Semua komponen Barisan Nasional ( BN) patut nyadika Parti Sa’ati Rayat Sarawak ( SUPP) ke chunto nengah pemujur parti nya ngempung enggau manah tiga iku chalun ke dikeandal ulih menang ba penuduk Parlimen Lanang maya Pengawa Bepilih Besai (PRU) Ke-14 ti deka datai.
Chairman Parti Rayat Sarawak (PRS) Dudong Kunsilor Sempurai Petrus Ngelai madah, tiga iku chalun parti nya nadai bepenanggul bekerejasama enggau pangan diri nyengkaum bela datai ngulu program tauka pengerami ke sebaka.
“Tu manah amat, sida tiga ulih begempung enggau pangan diri kelebih agi ba program ke bekaul enggau rayat enggau parti.
“Ulah baka tu tau bendar nyadi chuan ti manah ngagai parti komponen BN ke bukai.
“Ari tu kitai ulih meda SUPP iya nya parti ti ‘ tuai’ dalam politik,” pia ku iya madah maya Pengerami Makai Lemai Chalun BN/ SUPP Parlimen Lanang Begulai Enggau PRS Dudong enggau Bukit Assek ditu, empai lama tu tadi.
Chalun ti dikeandal BN/SUPP ke ulih menang ba Parlimen Lanang tu iya nya Ketuai Raban
Tu manah amat, sida tiga ulih begempung enggau pangan diri kelebih agi ba program ke bekaul enggau rayat enggau parti. Kunsilor Sempurai Petrus Ngelai Chairman PRS Dudong
Nembiak SUPP Bukit Assek Joseph Chieng, kaban SUPP Dudong ti mega seiku orang dagang Kelvin Kong enggau Sapit Chairman Dudong Wong Ching Yong.
Sama bela datai maya tu iya nya Penyanding Penemu BN Parlimen Lanang Chieng Buong Toon, Chairman PRS Bukit Assek Duli Sanggau, Chairman Uniti Bumiputera SUPP Dudong Kunsilor Ladong Engkol sereta bala bukai.
Sempurai ti mega Chairman Opis Kaunsil Menua Pesisir Sibu (SRDC) madahka sida tiga nya mujur mandangka diri ngembuan ulah rindu bekempit enggau pangan diri ngelama tu.
“Tu ulah dikedekaka kitai, chalun ke ulih begulai enggau pangan diri mutarka penanggul ke bisi nyadi ba rayat.
“Enda ngira sapa sida tiga dipilih ila, ke paling beguna iya nya penuduk Parlimen Lanang mujur diambi ari penyakal.
“Semua sida tiga tu ngembuan pengelebih ti chukup iya ke tau dikena gawa ngemansangka rayat ditu,” ku iya nerang.
Sempurai maya tu mega madah, taja penyampau raban PRS Dudong enggau Bukit Assek enda mayuh tang sida endang meri sukung ti tegut ngagai chalun nya nya bediri di Parlimen Lanang.
Bekaul enggau pengerami ke diatur lemai nya, iya meri puji ngagai SUPP laban sebedau tu sida PRS Dudong enggau Bukit Assek nadai kala dikangau ngulu pengerami begulai enggau chalun SUPP baka nya.
Kelvin, Wong enggau Joseph maya tu madahka diri randaka sukung semua parti komponen BN lebih agi baka PRS nyaup sida ngambi pulai penuduk Parlimen Lanang ari penyakal maya PRU-14 ti deka datai.
Sida tiga madah, nyema SUPP mujur ngambi penuduk nya, sida deka lantang agi nandu pengeransing bejalaika servis ngagai rayat ba parlimen nya.