Komiti parti patut chakah ngatur program ungkup pemaik rayat
ENGKILILI: Semua komiti parti kelebih agi Parti Rakyat Bersatu Sarawak ( SUPP) patut bejalaika sereta chakah ngatur program ti meri penguntung enggau pengelantang ngagai rayat.
Mandal Presiden SUPP (Pusat) ti mega penyanding penemu SUPP pampang Engkilili Datuk Francis Harden Hollis lebuh bejaku ba sebengkah aum SUPP Pampang Engkilili madahka, kaban parti mega patut ulih beserakup tauka besaup ngemujurka langgur tauka perambu ke udah dilangkar.
“Semua kaban komiti patut chakah bejalaika tanggungpen- gawa mantu raban bansa nengah ngatur mayuh program ke meri penguntung sereta pengelantang ngagai rayat ke seruran ngarapka ubah ti nuju jalai pengidup ti lebih manah.
“Nadai kebuah sanggu dalam pengawa meri servis ngagai raban bansa laban kitai bisi palan ti tegap nengah parti ti nyereta perintah ti merintah iya nya Barisan Nasional ( BN),” ku Menteri Muda Pengelantang Raban Bansa nya maya bejaku ba aum nya apin lama.
Aum SUPP Pampang Engkilili nya diatur ba bilik baum opis parti ti bechairmanka Harden.
Maya baum nya mega Chairman SUPP Pampang Engkilili, Kunsilor TR Roy Edward Entalai bisi nyuaka pom kaban baru parti nya.
Nyerumba aum nya, bisi diatur pengawa nyuaka chek ti sepenyampau semua RM28,000 ngagai bala tuai rumah ke bisi datai maya penemuai Menteri Kaunsil Kandang Menua enggau Pengawa Berumah Datuk Prof Dr Sim Kui Hian ke Rumah Dabong Stengin ujung bulan Mei tu tadi.
Sama bisi datai ba aum nya Sekretari Kediri Menteri Muda Pengelantang Raban Bansa Philip Foster Hollis.