Sibu tuai rumah ngintu Hari M’sia renggat nengeri
SIBU: Sibu dipilih nyadi tuai rumah ngintu Hari Malaysia renggat Sarawak ti deka diatur di Dataran Bandar Sibu ditu, kena 16 September tu.
Menteri Dagang Antarabansa enggau e- Dagang Sarawak Datuk Seri Wong Soon Koh madah, pengawa ngintu deka berengkah urung pukul 7.00 malam enggau mayuh macham program disedia nyengkaum ke bisi elemen patriotisme enggau pemerindang.
“Mantar pengerami dipun urung pukul 7.00 malam enggau konsert ti mai bala artis menua tu seraya nganti penatai Tuai Megai Menua (TYT) Tun Abdul Taib Mahmud enggau bini iya, Toh Puan Raghad Kurdi Taib urung pukul 8.00 malam.
“Bala sida deka disambut 100 iku nembiak sekula disempulang tempap Gendang 1Malaysia nyengkaum hadrah enggau tanda singa,” ku iya ba aum pengarang berita ditu, kemari.
Wong ke mega menteri mangku tanggungpengawa ngintu pengerami nya dibantu Menteri Muda Orang Indu, Ruang Bilik enggau Pemansang Anak Mit Rosey Yunus, Menteri Muda Betanam Betupi Dr Abdul Rahman Ismail sereta Menteri Muda Pelajar enggau Pansik Teknologi Dr. Annuar Rapa’ee.
Ku Wong, lagu nengeri deka ditebah maya penatai Taib lalu dientudika ‘overtur’ bejudul ‘Keindahan Malaysia’ ti mantaika tanda asal enggau ngitang semua tambai nengeri di Malaysia.
Taib deka ngelanchar pengawa ngintu pengerami pengudah jaku ari Kepala Menteri Datuk Amar Abang Johari Tun Openg.
Direktor Opis Pemadah Sarawak Abang Sardon Abang Hashim ti ngulukai Konvoi Kembara Jalur Gemilang deka nyerahka Jalur Gemilang ngagai TYT lalu udah nya deka nyerahka nya ngagai pemesai Soldadu Tasik Malaysia ngambika ditiki lalu digitang berebak disempulang lagu Negaraku.
Tu udah nya dientudi enggau pengawa pemerindang pengelama 15 minit ti berambaika jaku ‘Malaysia Negaraku’ ari 300 pesereta ti deka mantaika sajak disempulang enggau lagu sereta tanda.
Program deka tembu enggau pengawa mandangka bungai api.
Berindik ari nya, Wong nesau mensia mayuh sampal datai ngerichahka agi pengerami kelimpah ngitang Jalur Gemilang di premis sida empu kelai ngintu Hari Malaysia. — Bernama
Servis tu deka mungkur pengawa macha bup kudus enggau sembiang ti bebida. Maya servis tu, pengari ari mayuh bengkah gerija deka besembiangka pemesai kitai, bala ketuai sereta mega menua kitai. Elder Ambrose Linang Sekretari Besai ACS
Sekretari Besai ACS, Elder Ambrose Linang madahka bala kaban ari gerija ti bebida pengarap diperansang sampal datai lalu melabaka 2,000 iku deka datai ngulu servis taun tu.
“Servis tu deka mungkur pengawa macha bup kudus enggau sembiang ti bebida. Maya servis tu, pengari ari mayuh bengkah gerija deka besembiangka pemesai kitai, bala ketuai sereta mega menua kitai,” ku iya madah ngagai pengarang berita ba aum pengarang berita diatur di CEWC ditu, kemari. bup kudus deka dibacha dalam Jaku English, Jaku Malaysia, Jaku Iban, Jaku China, Jaku Kayan enggau Jaku Bidayuh,” ku iya.
Rambai jaku ungkup taun tu iya nya ‘ For Your Great Name’s Sake’ ti diambi ari genteran Daniel 9: 19.
Ku Ambrose, sebedau pengawa macha bup kudus enggau besembiang, Sapit Kepala Menteri Datuk Amar Douglas Uggah Embas deka nikika ‘ Jalur Gemilang’ enggau tambai nengeri lalu iya deka dibantu Menteri Pelajar, Sains enggau Pansik Teknologi, Dato Sri Michael Manyin Jawong.
Ku iya baru, sekeda ari servis ti deka diatur, besampika pengelikun dunya nyengkaum penyerakup enggau pengelantang semua raban bansa enggau jalai pengarap sereta jaku lalau deka dikunsi pastor Denney Neborof ari Gerija Seventh Day Adventist.
“Koir begulai datai ari kaban bebida gerija deka nguluka servis. Pengawa merekat ari bala ketuai gerika deka diuluka reverend Dr Lau Hui Ming ngarika Presiden Gerija Methodist China Sarawak, Reverend Dr Ting King Tai,” ku iya.
Ambrose minta semua raban Kristian di mengeri tu sampai datai ngulu servis sembiang dikena ngelai penyerakup enggau semengat bebaik lalu enda ngemendarka polarisasyen bansa enggau ekstremis jalai pengarap ngerusak komuniti kitai ti udah ngemansangka nengeri enggau menua Malaysia.
Sama bisi datai ngulu aum pengarang berita nya Chairman Komiti Pengatur Servis Sembiang Pastor Jacob Tupek, Sekretari Servis Sembiang Pastor Terry Valten, ari Seventh Day Adventist ( SDA) Pastor Brian Scott sereta Sekretari Eksekutif ari SDA Mission, Pastor Attie Gara.