KGS, JKK Genturong Mas Rawing beripai nyemin jalai nuju laman rumah dua iku ex-soldadu
KAPIT: Kelab Gagung Sibu Sarawak (KGS) bisi ngatur projek beripai bekerejasama enggau Komiti Pemansang Enggau Pengelikun Genturung Pendiau ( JKKK) Genturong Mas Rawing, Lubok Engkuang, Ulu Sungai Amang nyemin jalai nuju tengah laman rumah ke lalu nyadi palan engkah entukar dua iku ex-soldadu benama Ranger ( R) Bilun Anak Mandaw enggau Ranger (R) Sulau Anak Rawing bedau lama ke udah.
Berindik ari dua buah rumah tu dientak berimbai ari baruh program Rumah Mesra Rakyat ( RMR) dipelanja Opis Pekara Veteran Negeri Sarawak nengah konsep Jiwa Murni. Rumah tu dientak ngenang pemanah pengawa ke nyaga pengelikun menua.
Tetiap unit berega RM65,000. Bisi tiga bilik tinduk, sebuah bilik besai, dapur enggau dua bilik ai.
Projek beripai tu nyadi sebagi ari program KGS bepelasarka komuniti dikena mantu sida ti begunaka bantu. Tu sekeda ari program servis komuniti kelab diatur dalam taun tu.
Kaban Kunsil Nengeri (ADUN) Bukit Goram, Jefferson Jamit Unyat udah dikangau sereta dipebasa bejadika projek tu.
Dalam jaku dipansutka iya, Jamit muji KGS enggau JKKK Genturong Mas Rawing, Lubok Engkuang, Ulu Sungai Amang ba pemanah pengawa dipejalaika sida ngatur program beripai projek ungkup bala komuniti.
“Sehari tu aku berasai lantang meda pengawa KGS ukai semina chakah ngelakuka ngepan asal bujang berani Iban, Gagung, tang mega sida chakah ngereja servis rama ungkup komuniti sereta gawaka komuniti menua tu,” ku Jamit seraya merambu ngagai kelab ngatur aktiviti bukai (program maya lepa) ti ngaul bala pengari rayat di menua nya.
Ngelansa program beripai nya, Jamit madahka tu ulih mantu negutka pemanah tanggam kaul sereta pengerindu gawa begulai antara komuniti sereta mega nyediaka pelasar ungkup penyer- akup enggau pengelikun.
Nangkan nya ku iya, program tu mega nyediaka palan ungkup pengari rayat berandau enggau rayat ba renggat nembiak redak, nerima timbal ba peminta sida.
Ngelansa pasal pekara politik, Jamit minta peranak dia terus bediri tegap meri sukung ngagai chalun Barisan Nasional (BN) maya Pengawa Bepilih Besai Ke-14 (PRU14) tu ila.
“Penyandang kitai, chalun BN, Datuk Alexander Nanta Linggi ke mega Sapit Menteri Pemansang Menua Pesisir enggau Kandang Menua deka ngetanka penuduk iya. Anang saru penemu ari penyakal senentang isu ti mangka sida di Semenanjung Malaysia. Kitai udah bisi tim BN ti chukup manahg di Kapit, nya alai, aram mih kitai gawa begulai ngelangkar ungkup Kapit menyadi agi dudi hari,” ku iya.
Nyerumba pengawa nya, Jamit bisi ngemendarka geran perintah ungkup Genturong Mas Rawing, Lubok Engkuang, Ulu Sungai Amang dikena bejalaika pengawa ngemanahka rumah sida, penyampau RM12,000.
Sama bisi datai Sekretari KGS Martin Bilun, Pemesai Penyambung Kelab Kapit, Favian Masing Lintang, Penghulu Madang Jelani, Tuai Rumah Richard Engking, Kaunsilor George Tang sereta lebih sepuluh iku kaban KGS ke bukai.