Juluk ngemuang rintai nama KIR BTBL deka dikemujur dalam timpuh dua bulan
KUCHING: Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Datuk Fatimah Abdullah, madahka juluk opis menteri dekaka rintai nama ketuai ruang bilik ‘ Belum Terima Bantuan Langsung’ ( BTBL) ari baruh Sistem e- Kasih nyadi ‘ zero’ dalam timpuh dua bulan tu.
Nitih ku iya, naka 15 Ogos tu tadi, bisi 383 ketuai ruang bilik udah mujur diberi bantu.
Ku iya, nya bepelasarka ‘ locked figure’ ti dirikod pun taun 2017 ti sepenyampau 419 ketuai ruang bilik.
“Bisi 383 ketuai ruang bilik tauka 91.41 peratus BTBL udah diberi bantu ari rikod ‘locked figure’ pun taun ( 2017) ti bisi 419.
“Laluh lebih iya (36 ketuai ruang bilik), juluk kitai deka nyadi ‘ zero’ dalam timpuh dua bulan agi,” ku iya.
Fatimah mantaika pekara nya lebuh bejaku ba ‘ Bengkel Pelan Tindakan Miskin Tegar Sifar 2018’ ba Begunan DUN Lama ditu, kemari.
Ngenang silik pasal pekara nya, iya madahka penyam- pau semua ketuai ruang bilik dalam rintai nama e- Kasih Sarawak naka 15 Ogos tu tadi bisi 115,935 ketuai ruang bilik.
Penyampau nya mungkur 23,282 ketuai ruang bilik ti diberi dalam kategori Miskin Tegar; 39,110 ketuai ruang bilik Seranta enggau bisi 53,543 ketuai ruang bilik udah pansut ari rintai nama nya ketegal beberapa pekara.
Lebuh ke ngenang pasal kursus ke diatur Opis Pe- mansang Perintah Besai Nengeri Sarawak (PPPNS) nya, Fatimah madahka tuju nya dikena ngelanggur sereta ngasilka langkar ke ulih nyapai juluk ‘ Miskin Tegar Sifar ( MTS)’ lebuh manggai taun 2018.
Ku iya, langkar nya deka nyadi inisiatif ba atur pengawa nyapai juluk ke nyata.
Belalauka pekara ti ditetapka dalam Aum Focus Group Ngemunas Penyeranta Renggat Nengeri Sarawak kena 29 Jun tu tadi, Fatimah madahka juluk MTS patut diputarka ba taun 2018.
Langkar tauka pelin nya ulih dikena ngurangka sepenyampau 50 peratus raban seranta ba taun 2020.
Taja pia ku iya, MTS bepanggai ngagai ‘ locked figure’ ba kategori Miskin Tegar ti dirikod kena 1 Januari 2017 ti bisi 27,769 ketuai ruang bilik enggau 37,081 ketuai ruang bilik seranta.
Iya ngarapka juluk MTS ba taun 2018 ulih nyadi nyata, taja pia deka nyapai status nya beguna penyakah enggau pelin tauka langkar ti tegap.