Peranak Lapok randaka bekal ai beresi, kuasa karan
MIRI: Komuniti dagang, opis enggau ejensi perintah di Lapok iya nya kandang menua tengah di sitak Baram begunaka bekal ari beresi enggau kuasa karan 24 jam.
Chairman Parti Keadilan Rakyat (PKR) Baram, Roland Engan madahka serebana tu dibantaika bala komuniti dia ke alai piak bekuasa bisi semaya nentuka projek nyambung paip ai enggau bekal kuasa karan deka tembu dalam bulan March 2017.
“Isu tu begunaka pemutar ti lengkas ke alai piak bekuasa udah besemaya ngagai bala komuniti di Lapok,” ku Ro- land pengudah bejalai ngabas pasar Lapok begulai enggau bala kaban PKR ke bukai.
Nitih ku Roland, pekara tu udah, benung sereta deka ditapi raban komuniti dagang, penguna, rumah panjai besemak sereta nembiak sekula di Lapok laban sida bedau nerima bekal ai beresi enggau kuasa karan 24 jam.
Ku iya, lebuhka ngabas komuniti dagang enggau peranak ti diau mendam di kandang menua nyu, sida lalu mantaika serebana pasal dua isu kritikal ti beguna endar ngagai sida, bekal ai beresi enggau kuasa karan.
Nangkan ke nya, komuniti dagang begunaka bekal ai beresi enggau kuasa karan 24 jam laban nyema isu tu diputar, bala sida ulih bejalaika dagang ninting hari enggau nadai penanggul.
Ku Roland, komuniti dagang enda ulih bedagang laban suah napi suntuk bekal ai lalu nadai bekal kuasa karan maya malam hari ngujungka sida tejanggal bejalaika dagang.
“Bekal ai beresi enggau kuasa karan endang beguna endar ngagai komuniti lalu dikearap piak bekuasa bekaul ulih ngamatka semaya sida rambau pengawa bepilih nyin tadi ngambika peranak di Lapok ulih bejalaika dagang enggau pengawa sida besehari-sehari enggau nadai penanggul,” ku Roland nandu.
PKR Baram ngansak semua piak bekaul ngambi nembuka projek enggau jampat sereta anang nuduh piak bukai ti deka enda ulih mutarka isu nya.
Penembu projek tu ila, deka ulih nangkatka tikas pengidup komuniti Lapok manah agi lalu bala nembiak enda napi penanggul mandi enggau bebasu gari ngagai sungai Tinjar ti ditemu mayuh jagu.