R&D ulih mantu ngintu, ngetanka rampa menua asal
Kelimpah arinya R&D tu mega ulih mantu ngemansangka industri nengah teknologi, ku Abang Johari
SIBU: Kaul sesebuah organisayen dalam sektor Pemansik enggau Pemansang (R&D) ulih ngurangka pengawa kelalu bepanggai ba rampa menua asal ti enda ulih dikemaru.
Kepala Menteri Datuk Amar Abang Johari Tun Abang Openg madah kelimpah ngurangka pemerat ngagai pemansut asal, R&D mega ulih mantu ngemansangka industri nengah pengawa ngemanahka teknologi.
Ku iya, puku dalam R&D mega ulih meri penatai pemisi sereta sektor industri ulih besemekih dalam timpuh panjai.
“Nengah pemansang teknologi asil ari R& D nya empu, pekara tu ulih negutka agi sektor industri agi, nge- megah sereta ulih ngenukuka barang ke dikeluarka kediri.
“Kaul organisasyen ba R& D mega ulih nangkup peminta penguna ti seruran berubah sereta ngasilka produk ti kualiti,” ku iya.
Iya madah munyi tu lebuh bejaku ngulu Pengawa Projek Nyambung Blok Begunan Baru Indu Opis Kumpulan Syarikat Ta Ann ditu, bedau lama.
Sama bisi datai Menteri Muda Perambu Mengeri, Pengatur Tanah enggau Rampa Menua Datu Len Talif Salleh, Chairman Eksekutif Kumpulan Syarikat Ta Ann Datuk Amar Abdul Hamed Sepawi enggau Ketuai Pemesai Eksekutif Kumpulan Syarikat Ta Ann Datuk KH Wong.
Ku Abang Jo kaul Kumpulan Syarikat Ta Ann ba R&D endang patut ditunda kompeni ke bukai di nengeri tu laban pemansang dalam R&D ti tegap nyadi seiti ari pun pekara ulih ngemansang sereta ngerembaika ekonomi nengeri Sarawak.
Ku iya, perintah mega deka terus nyukung pengawa mansik pekara pemun enggau guna dikena nambahka produktiviti enggau runding ti ulih besemekih.
Ba Sarawak ku iya, tu nyadi pemun dikena meri fokus ngagai ekonomi digital ti dipegai teknologi ba pengawa ngetanka pengelebih runding ti ulih besemekih.
Ubah tu mega begunaka perintah ngangkatka inovasyen sereta daya kreatif nyadi pun dikena nyapai pengerembai ekonomi nengeri.
Nengah pemansang teknologi asil ari R&D nya empu, pekara tu ulih negutka agi sektor industri agi, ngemegah sereta ulih ngenukuka barang ke dikeluarka kediri. Datuk Amar Abang Johari Tun Abang Openg Kepala Menteri