Asil pengelandik jari ulih mantu nambahka penatai pemisi
KAPIT: Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi muji atur Kus Asil Pengelandik Jari Felt ti nyadi program ngulihka belanja (nambahka penatai pemisi) ungkup raban khas ke datai ari raban kurang penatai pemisi.
Ku iya, Opis Pemansang Mensia Mayuh (KEMAS) ari baruh KKLW bisi ngelangkar mayuh macham program dikena nambahka penatai pemisi.
Berindik ari nya, Kus Asil Pengelandik Jari Felt tu sebagi ari program nya ke nyaup ngansah pengelandik ngambi ulih nempa asil pengelandik jari kreatif sereta pengawa nusuk manik dikena ngulihka belanja.
Kelimpah ari latih pengelandik, KEMAS mega bisi ngadaka palan pelajar tumu nembiak mit (Tadika enggau pra-sekula) sereta mega ngadaka Kelas Literasyen Orang Besai Tuai.
Ku iya, perintah endang bisi ngatur mayuh program mantu nambahka penatai pemisi. Kelimpah ari KKLW, Opis Menteri Betanam Betupi, Opis Pengintu Pengelantang Mensia Mayuh (JKM) enggau ke bukai entara opis tauka ejensi ke udah dituduhka perintah bejalaika program enggau tuju ti sama.
“Asil pengelandik jari ukai semina digaga dikena ngias rumah aja tang ulih dijual dikena nambahka belanja. Ambika chunto, pua kumbu bisi rega tinggi dalam makit kelebih agi dijual ngagai bala temuai,” ku Nanta lebuh bejadika pengawa nutup Kus Asil Pengelandik Jari Felt.
Nanta mega meransang bala pesereta ngemeranka penge- landik jari sida dikena ngulihka belanja.
Bisi 20 iku pesereta udah dipilih datai ari Song enggau Kapit nyereta kus diatur KEMAS Kapit, pengelama tiga hari berunggu di Hotel Meligai, bedau lama ke udah.
Bala pesereta kus iya nya Niah Bili, Runai Jantan, Martha Elik, Christina Untam, Salina Kassim, Susiana Sambau, Rose Beji, Doris Mani, Ruzen Ruin, Sylvia Anjie Umpang, Roslind Gelau, Jean Chabu, Sani Chabu, Bita Ambau, Seripah BUdit, Rosnah Igang, Huring Mail, Beta Alek, Dayun Jugi enggau Teresa Jarraw.
Sekeda bala temuai dipebasa ke bisi datai Kaban Kunsil Nengeri (ADUN) Bukit Goram Jefferson Jamit Unyat, Sekretari Politik Kepala Menteri Sarawak Tapah Ata sereta bala ke bukai.