Pemujur raban nyerungkai rasia MA63 ngemegahka peranak S’wak
MIRI: Peranak Sarawak kelebih agi Bansa Dayak chukup temegah ati enggau raban ti dianjung Kepala Menteri Abang Johari Tun Abang Openg, ke betuju nyerungkai dokumen rasia dikena ngambi pulai hak Sarawak maya numbuhka Malaysia suba.
Menteri Muda ba Opis Kepala Menteri (Undangundang, Kaul Sarawak enggau Perintah Besai sereta Matau Projek), Hasidah Sayeed Aman Ghazali, nerangka tuju ngiga fakta Sempekat Malaysia 1963 (MA63) ke London endang chukup manah. Ku iya, raban nya deka beratika isu ngambi pulai baru hak nengeri tu ari perspektif enggau peminta peranak Sarawak lalu peranak Sarawak patut dikemeratka.
Nyadi ketuai raban bansa Dayak, Chairman Pemansang Dayak (PD), Baba Emperan, mega lantang ati berati enggau pemujur tuju pejalai tim MA63, Kepala Menteri Datuk Amar Abang Johari Tun Abang Openg ke London.
Ku iya, endang udah nyadi batang tuju penumbuh PD ngambika ulih mai pengelantang ngagai raban bansa Dayak, lalu iya pechayaka pekara ti ditemu raban tim MA63 deka nyaga hak bansa Dayak dudi.
“berebak enggau nya, kami mega ngansak Kepala Menteri majakka pengelurus iya dalam mutarka isu autonomi sereta ngansak Menteri Besai Datuk Seri Najib Razak mulaika baru hak Sarawak ngagai Sarawak nitihka jaku enggau juluk niang Tok Nan, ex-kepala menteri kitai,” ku Baba.
PD tu sebuah gempung ukai dikuasa perintah (NGO) ti negika hak, bejalaika pengawa pengasih sereta ngintu pengelantang raban bansa Dayak.
Mandal Chairman PD, Jeffry Unggat ba jaku dipansutka iya madah, tuju pejalai MA63 ari baruh pegai Kepala Menteri Datuk Amar Abang Johari Tun Abang Openg, udah mujur nyerungkai sekeda dokumen ke beguna endar, lalu tu udah ngasuh rayat Sarawak berasai lantang ati.
“Tu berita ti manah, kelebih agi ngagai bansa Dayak ti udah lama negika hak bansa Dayak, kelebih agi ba hak tanah Adat Bansa Asal (NCR),” ku iya.
Sekretari PD, Ernie Jimmy mega mansut penerang ke sama madahka pengawa deka nyerungkai dokumen bekaul enggau MA63 udah ngem- pung rayat, nyengkaum sida ari penemu politik ti bebida.
“Tu nyata meri kelai ngagai perintah Malaysia ke alai peranak Sarawak ulih begempung, taja kami datai ari parti politik enggau prinsip ti bebida, kelebih agi datai ba hak kami, bekaul enggau MA63,” ku Ernie.
PD pechaya, pemujur tim Misyen MA63 kepala menteri ke London udah muka peluang ngagai Sarawak ngulihka baru hak iya, kelebih agi ba bayar royalti minyak sereta mega hak ari baru Akta Garis Entara Menua di Tasik, 2012. KUCHING: Sarawak ngarap ulih nyendiaka penerebai bilun terus ngagai sekeda menua besai baka ke China, Hong Kong, Taiwan sereta Thailand.
M e n t e r i D a g a n g Temuai,Seni, Main Asal, Nembiak enggau Lumba Datuk Abdul Karim Rahman Hamzah madah, pekara nya besai reti ngambika ulih matak mayuh agi temuai ari menua luar datai ke nengeri tu.
Ku iya, penerebai bilun terus nya mega meri pengelantang ngagai orang ari menua luar ti deka datai ngulu sekeda aum renggat entarabanga ke bisi diatur di Sarawak.
“Kitai ngarap ulih nyendia penerebai bilun terus ngagai China, Taiwan, Thailand enggau Hong Kong sebedau ujung taun tu.
“Dulu suba kitai udah bisi penerebai terus ke Hong Kong tang udah diketu lalu ngarap ulih digaga baru,”ku iya.
Abdul Karim mansutka jaku nya ngagai pengarang berita pengudah bejadi Aum Pre-Asia Pasific Orchid (Pre-APOC) di Pustaka Negeri Sarawak ditu, kemari.
Abdul Karim pechaya pengingin Sarawak ti dekaka penerebai bilun terus nya ulih nyadi nyata ba taun 2019.
Ngenang sentang Aum Pre- Asia Pasific Orchid (Pre-APOC), iya madah rampa menua tauka kampung di Sarawak chukup manah endur bungai orkid idup.
“Mayuh bansa bungai orkid ke bisi tumbuh ditu nyadi sebengkah agi pekara ke matak temuai datai.
“Bisi 2500 nyentuk 3000 bengkah orkid ari 148 menua lalu 40 peratus ari nya bisi tumbuh di menua tu,’ku iya.
Aum Pre-APOC ku iya, nyadi pelasar ti manah ukai semina ungkup orang ti rinduka bungai orkid tang mega ungkup orang dagang ba industri orkid.
APOC ke-13 deka diatur di Kuching ba taun 2019 lalu disadang digulu pengari ari Jakarta (Indonesia), Chiang Mai ( Thailand), Korea, China, Taiwan enggau Fukuoka, Nagoya sereta Okinawa, Jepun
Aum orkid renggat entarabansa tu diatur 3 taun sekali, lalu keterubah endar diatur di Tokyo, Jepun ba taun 1984.
Bela datai Direktor Dewan Bandaraya Kuching Utara( DBKU) Jumaini Haili enggau orang bukai.