Jalai alternatif diperambu digaga ngagai Danau Bakun

KUCHING: Opis Menteri Pemansang Infrastruktur enggau Perengka Pengangkut merambu ngaga jalai alternatif ungkup peranak sereta temuai ti deka ngagai Danau Bakun.

Menteri opis nya, Tan Sri James Masing madah diatu semina seiti jalai nuju tasik nya, iya nya nengah jalai ‘Keselamatan Bakun’ ti enda engkeman ungkup timpuh panjai.

Berindik enggau nya ku iya seiti agi jalai nuju danau deka digaga ungkup peranak enggau temuai.

“Jalai alternatif ke diperambu tu urung pemanjai 12 kilometer (km) lalu kala nyadi jalai kompeni kayu batang dulu agi ari tu.

“Kitai ngarap Sarawak Energy Berhad (SEB) ulih mantu kitai ngaga jalai tu,’ku iya ba penemuai kereja ngagai palan endur ngaga pengkalan baru Danau Bakun kemari.

Ba penemuai nya, Masing ke mega Sapit Kepala Menteri bisi mendingka jaku penerang sentang kebuah pengkalan ungkup guna mensia mayuh patut digaga kelimpah ari pengkalan SEB ba danau nya.

Pengkalan ungkup guna mensia mayuh nya ku iya deka diguna peranak Bakun mai asil ikan ke diulih ari tasik.

Maya ke diatu, pemeli ikan ari Bintulu, Sibu, Miri enggau mengeri bukai datai dua kali seminggu meli ikan di Danau Bakun ba pengkalan SEB.

“Perambu ngaga pengkalan baru enggau jalai beringkat besemak enggau pengkalan nya deka nyendia palan ke lantang endur bejual ikan pengudah tembu ila.

“Udah nya ila, kitai deka nyendia perengka guna bukai baka ke ai sereta lekterik di pengkalan nya ungkup pengelantang semua,” ku iya.

Masing pechaya pengkalan baru nya ila deka nyaup ngangkatka pengawa berikan di Danau Bakun.