Mulaika hak S’wak ba dagang temuai deka dikerandau enggau Perintah Besai

KUCHING: Mulaika hak Sarawak ba pekara dagang temuai entara isu besai ti deka dikerandau enggau Perintah Besai, Ku Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah.

Iya madah, Sarawak seruran meretika pekara ke bekaul enggau dagang temuai nyadi pekara ke nyadi tanggungpengawa nengeri tu.

‘Kitai udah bisi menteri dagang temuai kenyau ari taun 1985 ke alai Perintah Besai semina bisi menteri dagang temuai berengkah ari taun 1994.

“Dagang temuai dipasuk ba rintai tanggungpengawa Perintah Besai nengah chara belalai ba taun 1994.

“Sebarang konstitusyen luyar deka madah pekara ke baka tu patut dipasuk dalam rintai ‘residual list’.

“Dalam Konstitusyen Perintah Besai, pekara dalam ‘residual list’ nyadi bengkah pekara ke nyadi tanggungpengawa perintah nengeri,’ku iya.

Abdul Karim mansutka jaku nya ngagai pengarang berita pengudah bejadi Aum Pre-Asia Pasific Orchid (PreAPOC) di Pustaka Negeri Sarawak ditu, kemari.

Ngenang kaul ke sama, iya madah mayuh mega pekara bukai ke bekaul enggau hak Sarawak deka dikerandau enggau Perintah Besai.

“Mayuh pekara bukai ke diasai kitai udah lenyau kenyau ari taun 1963 kelebih agi ba sentang garis adan tasik sereta pengereja asal ke dikembuan.

‘ Nya mih kebuah kitai nganjung delegasyen ke London ngambi tau meretika pekara ke dipesetuju sebedau nyain Sempekat Malaysia,’ku iya.

Ba sentang dagang temuai ku iya, Sarawak udah bisi Kaunsil Dagang Temuai Sarawak ti bejalaika tanggungpengawa ngelaku nengeri tu, lalu pia mega Sabah.

Kitai ngaga kerejasama rat enggau Sabah, baka ni asai kitai baka nya mih asai Sabah, tandu Abdul Karim.