Bediri tegap dibelakang Kepala Menteri: Uggah
Ngambika kitai mudah agi nyapai pemansang sereta juluk nyadi nengeri bepenatai pemisi tinggi
MIRI: Peranak Sarawak dipinta bediri teguh di belakang Kepala Menteri (KM) Datuk Amar Abang Johari Tun Openg sereta gawa rat begulai enggau perintah nengeri dikena nyapai tagit nyadi nengeri bepenatai pemisi tinggi manggai ba taun 2030.
Mansutka jaku nya, Sapit Kepala Menteri Datuk Amar Douglas Uggah Embas madahka Abang Johari ke nyadi Kepala Menteri nukar penuduk niang Datuk Patinggi Tan Sri Adenan Satem, udah ngelancharka mayuh bengkah program transformasyen enggau pengarap nengeri tu deka ulih nyadi nengeri bepenatai pemisi tinggi datai ba taun 2030 ila.
“Nengeri kitai udah betambah manah ari sukut ekonomi, aku ulih meda jalai sekut enggau kerita lalu tu nyata ngayanka ekonomi kitai jauh manah ari ke dulu.
“Taja pia, Kepala Menteri kitai bedau tepantup ati sereta udah ngelancharka program transformasyen di Sarawak lalu pengawa tu ukai muntang, tang iya udah ngeringka ati diri nyadi ketuai,” ku iya lebuh bejadika Pekit Lumba Bot Laju enggau Bot Pam di Regata Baram, Marudi kemari.
Ku Uggah, sekeda ari program transformasyen ti diadaka dikena ngubah rampa ekonomi di nengeri tu nengah ekonomi digital.
“Aku beratika ekonomi digital ukai semina ngaul pengawa berandau ngena telefon binching enggau internet aja, tang mega ulih ngubah sektor betanam betupi kitai,” ku iya.
Ku Uggah nambah, dalam pun minggu tu tadi, bisi 21 iku pengelicha ari Taiwan, Vietnam, Thailand, United States, Australia sereta mega ari Kuala Lumpur nemuai ke Kuching ngulu Konferen Antarabansa Betanam Betupi enggau Industri Agro Sarawak.
“Kitai meda Vietnam maju agi ari kitai lalu sida eksport produk sida ngagai menua luar. Bala sida bekenaka Teknologi Pemadah enggau Arus Penyambung ( ICT) nyadika pelasar dikena nambahka produktiviti enggau pemansut asil sida.
“Kitai chukup optimistik, ekonomi digital mega ulih ngubah chara lama ba pengawa betanam enggau ngerachun,” ku Uggah.
Ku iya nambah, Kepala Menteri udah numbuhka bank nengeri kediri empu ti dikumbai Bansa Pemansang Sarawak (DBOS) dikena nyungkak ekonomi nengeri enggau transformasyen digital.
Kelimpah ari ekonomi digital, ku Uggah, CM mega ngemeratka pekara pelajar.
“Abang Johari ngemeratka pekara pelajar lalu iya udah berundingka chara dikena ngiga mayuh agi belanja ungkup Yayasan Sarawak dikena melanja bala nembiak ti deka nampung pelajar sida.
“Ba iya (Abang Johari), pelajar tu beguna endar, nya kebuah iya ngadaka Opis Menteri Pelajar di nengeri tu ngambika semua penanggul bekaul enggau pekara pelajar kitai ulih diputarka ditu,” ku iya nampung.
Uggah mega madahka pemutus Kepala Menteri nikika chas premium ngagai kayu bukit ari RM0.80 ukai ngagai RM8, tang RM50, nyadi pengawa chukup berani laban iya ngasaika udah umbas endur nikika wang turu ungkup Yayasan Sarawak ti ulih dikena ba tuju pelajar.
“Iya (kM) deka majakka transformasyen ba pelajar kitai,” ku Uggah.
Ba lansa ke bukai, ku Uggah, kabinet nengeri udah setuju deka ngubah nama Unit Pekara Ukai Islam ngagai Unit Ungkup Pengarap Bukai, lalu unit tu udah ditumbuh nengah philosophi Kepala Menteri, ke alai atur pengawa nya enda tau enda inklusif.
“Aku udah ngelala iya kenyau ari taun 1983 lalu aku ulih nyamin kita, iya tu seiku ketuai ungkup semua peranak Sarawak lalu polisi iya mega nyata ngayanka iya ukai semina retorik politik aja, tang iya gawa nundaka jaku,” ku iya.
Seiti ari pekara ti nyata, ku Uggah, lebuh Kepala Menteri ngemendarka belanja RM15 juta ngagai unit nya ngambika diagih ngagai mayuh bengkah rumah sembiang di nengeri tu.
“Aku enda ngasaika nya naka tu aja, aku deka nganjung mayuh agi lis, lalu aku ngasaika iya deka berundingka lis nya laban iya ngasaika pangku pengawa unit beguna endar maya nyadi penyambung antara mayuh bengkah raban pengarap.
“Udah mayuh pekara dijapai kitai diatu laban kitai diau dalam penyerakup enggau pengelantang.
“Perintah ulih datai enggau teknologi pemadu baru ba pengawa betanam betupi, sukung, tang pekara pemadu beguna iya nya rayat anang enda ngambi bagi lalu ngubah ulah,runding sida,” ku iya.
Ngelansa pasal Regata Baram taun tu, ku Uggah, perintah nengeri udah meri sukung iya ngagai pengerami tu nengah pengawa meri pel- uang dagang ngagai peranak menua tu laban mayuh bala temuai ukai semina datai ari mengeri tu empu, tang mega ari menua besemak baka Brunei mega bisi datai.
Nya mega nyadi pelasar dikena ngempung rayat ari semua serak pengidup lalu nerenak ulah beserakup sereta bekunsika penemu chara deka gawa ngemansangka nengeri.
“Aku meri pengaga ati ngagai bala komiti pengatur kelebih agi bala pengari rayat ti udah bebendar gawa nentuka pemujur atur pengerami tu.
“Aku dipadah ukai mudah ngatur iya, nya kebuah kitai enda ulih ngatur nya ninting taun. Taja pia, ketegal sukung ari perintah nengeri enggau pengawa dipejalaika bala YB kitai ditu, regata taun tu nyadi nyata.”
Bisi 90 iku pesereta ngambi bagi dalam pekit lumba bot laju enggau bot pam kemari.
Uggah ngemendarka geran penyampau RM20,000 ungkup Regata Baram.
Sama bisi datai Menteri Muda Kaunsil Kandang Menua ke lalu nyadi Kaban Kunsil Nengeri ( ADUN) Marudi Datu Dr. Penguang Manggil, Sapit Speaker Aum Kunsil Nengeri (DUN) ke mega ADUN Mulu Datuk Gerawak Gala, Kaban Parlimen (MP) Baram Anyi Ngau enggau ADUN Telang Usan Dennis Ngau.
Nengeri kitai udah betambah manah ari sukut ekonomi, aku ulih meda jalai sekut enggau kerita lalu tu nyata ngayanka ekonomi kitai jauh manah ari ke dulu. Datuk Amar Douglas Uggah Embas Sapit Kepala Menteri