Ekonomi digital pelasar manah dikena ngerandang dunya dagang
KUCHING: Ekonomi digital ti dipunka Kepala Menteri Sarawak Datuk Amar Abang Johari Tun Openg dikena nyungkak ekonomi peranak di nengeri tu kelebih agi sida ke diau di menua pesisir lalu enda ngelaungka sida di mengeri.
Nengah pengawa bekenaka teknologi pemadah enggau arus penyambung (ICT) tu, raban orang dagang ti ngaul diri dalam industri kraf jari mega deka nyingkang nitihka singkang peranak menua bukai ti udah dulu ngerandang jalai dalam dunya ekonomi digital.
Angelia David Langi, peranak asal Sri Aman, udah ngaul diri pengelama 10 taun dalam bidang kraf jari, manik enggau seramik, nerima manah penemu enggau pengawa ti dipejalaika kepala menteri nya.
Ku Angelia, penemu ICT enggau konsep ekonomi digital kemaya hari endang beguna endar sereta mai mayuh pemaik ngagai sida ti ngemeranka pengawa dagang di menua pesisir lalu pekara tu nyadika peransang ngagai sida chakah agi ngaul diri besemekih enggau bala bukai.
Nangkan nya ku Angelia, teknologi tu nyadi seiti ari pengawa dikena ngubah industri mit enggau jelan iya pemesai (IKS) baka industri kraftangan di nengeri tu ngambika bisi makit ukai semina dalam menua tu empu tang mega di menua luar.
Iya ke mega nyadi Kaban Malin Orang Dagang Sarawak (RPUS), seruran nyikap diri ngena penemu baru kelebih agi dalam teknologi ngaul seramik, inkubator enggau ke bukai nentuka diri ulih nangkup peminta makit dalam industri nya.
“Dalam industri kraftangan, kami endang diperansang bekenaka teknologi baru kelebih agi ICT ngambika kami ngembuan rentayan dagang ti besai agi, ukai semina bisi tagit ba dagang dalam menua, enti ulih ngemai asil kraf ngagai renggat antarabansa.
“Ba aku empu, ekonomi digital tu nyadi pelasar pemadu manah dikena ngerandang jalai ngemansangka dagang diri sereta nyerungkai mayuh agi penemu ti bekaul seraya belajarka chara bekenaka teknologi baru,” ku Angelia, ke mega kaban Persatuan Usahawan Wawasan Wanita Sarawak (SARANITA).
Kena 27 Ogos tu ila, program ‘Gelembung Internet’ Google deka nyadi projek pemungkal ti dipejalai nengah kerejasama Silicon Valley, ari Amerika Syarikat (AS) lalu deka diuji keterubah iya di dunya, di Long San, Ulu Baram.
Nitih ku Abang Johari, pemisi gelembung diterbai ngagai remang ila, iya ulih meri sambung internet ngagai kandang menua entigis di Sarawak enggau Long San nyadi pemungkal.
Jaku dipansutka Abang Johari rambau bejadika Karnival Pengerai Ulu Baram Ke-6 diatur Kumpulan Syarikat Samling, di Kem Pusat Baram, diempu sarikat nya di Kilometer 10, Ulu Baram bedau lama ke udah, meri besai agi pengandal ngagai Angelia, ke alai raban orang dagang kraftangan meda bulih pemaik ari program nya.
“Enti ulih, pengudah program keterubah di Ulu Baram mujur, kami di Sri Aman mega ngandalka diri deka nerima sereta ngasaika perengka guna ke sebaka ngambika kami jampat agi ulih ngaul diri dalam ekonomi digital sereta nempa dagang datai ba tikas antarabansa.
“Nengah program tu (Gelembung Internet), kami mega deka ngembuan rentayan dagang besai agi, penatai pemisi mayuh agi dikena nangkup belanja idup tinggi pangka ari ekonomi dunya ti enda tegap,” ku Angelia nyemetak.
Ngelama tu ku iya, sida semina bepanggai ba pengawa ngaul diri dalam ekspo enggau pengawa bejual ke bukai lalu makit semina naka nya aja. Tambah mega, timpuh endur bejual tauka mandangka produk enda lama.
“Pengeran kami ke datai ari jauh, napatka mengeri besai baka di Kuching, nyereta ekspo enggau pengawa ke bukai.
“Kami nemu bisi peminta ke tinggi, tang mar ditangkup laban nadai sambung internet tauka palan ti engkeman endur ngelakuka produk,” ku iya, ke mega kaban Society Craft Achievement Rural Folk Sarawak.
Nya alai, iya ngarapka piak opis enggau ejensi bekaul mega ulih numbuhka Palan Inovasyen di Sri Aman baka ti udah ditumbuh di Sarikei bedau lama ke udah laban peranak di menua nya mega begunaka palan ke sama dikena ngulihka penemu, penerang enggau pengelandik ke patut ari palan nya.
Iya beratika palan nya endang chakah bejalaika pangku pengawa diri nengah pengawa ngatur Seminar e- Dagang Digital enggau Worksyop e-Dagang ti diatur begulai ari baruh Kaunsil Pemansang Orang Dagang Bumiputera (MPUB) enggau Seksyen Indu Balai Dagang Bumiputera Sarawak (DUBS Dewanita) ke nyadi program pemungkal, 22 ngagai 23 Ogos tu tadi.
Ku Angelia, program ke bansa nya ti patut chakah agi dipejalai lalu ngaul raban orang dagang di menua pesisir kelimpah ari program Gelempung Internet ti deka nyadi peransang ngagai pemujur juluk ekonomi digital di nengeri.
Kala nyadi pesereta Inkubator Seramik MIETI SIRIM Sarawak, Angelia endang bisi besai pengarap ekonomi digital deka nyapai juluk iya, ngubah Sarawak ngambika mansang sereta maju dalam dunya digital, tang mega deka ngubah kuing runding peranak di nengeri tu nyadi pedagang digital.
“Juluk ati deka meda industri kraftangan kelebih agi seramik ulih mansang nyerumba pemansang ICT dunya enggau ekonomi digital ke bukai,” ku Angelia nyimpul jaku diri.