JBPN mujur ngemanah tujuh buah rumah nengah program Strategi Tasik Gadung Nasional
SARIKEI: Opis Pengerara Api enggau Penyah Penusah ( Bomba) Nengeri ( JBPN) mujur ngemanahka tujuh buah rumah ti patut dikemanah di nengeri tu enggau belanja diagih ari baruh inisiatif Strategi Tasik Gadung Nasional (NBOS) perintah.
Pekara tu dipansutka Ketuai Bomba Zone Sibu, Abdul Rashid Mutalib rambau bejadika kelai pengawa nyuaka seiti ari projek ti udah tembu ngagai penerima, ditu kemari.
Enam ari tujuh buah rumah ti dipilih nyengkaum dua di Kuching, dua di Samarahan, sebuah di Bintangor lalu sebuah di Sarikei udah tembu seraya sebuah di Kanowit udah manggai 90 peratus tembu, ku iya.
Agih belanja endang dikena bebelika ramu dikena berumah seraya orang gawa datai ari bala staf opis Bomba di kandang menua nya empu, ku Mutalib nerang nama kebuah belanja dikena ngemanah chukup mudah.
Kelimpah ari pengawa ngemanahka rumah ti patut dikemanah, piak Bomba mega ngaul diri ba pengawa ngentak baru rumah ti udah dituntung penusah angus.
Dua projek ke bansa nya udah dipejalaika sida ari Miri enggau Lawas, ku iya, seraya nambah, pejalai projek ke sama di Tatau mega deka dipejalai enda lama da agi.
Sepenyampau RM255,000 agih belanja ungkup taun tu, Bomba mujur ngemanahka tujuh buah rumah enggau belanja bela penyampau RM15,000 sereta ngaga baru tiga buah rumah berega RM50,000 sebuah, ku iya nambah.
Mutalib ke mega bisi nyuaka perengka pengerara api ngagai pengempu rumah, nangkan sida ngambika bejejimat enggau sistem sambung tali karan dalam.
Iya nangkan peranak nguna servis raban ngaga sambung tali karan ti diakun ngambika nyambung tali karan dikena nyeliahka penusah angus.
Sekeda bala ke bisi datai rambau pengawa ti diatur di rumah penerima projek di Jalai Baji ditu Ketuai Bomba Pelilih Sarikei Suna Kaha sereta bala ketuai raban bansa di menua nya.