Kelirieng, keludun deka diintu perintah nengeri
KUCHING: Komuniti Punan di Sarawak nyukung pengawa ke deka digaga Perintah Nengeri Sarawak, ke deka nyaga ‘ kelirieng’ enggau ‘keludun ‘ ke bisi ditemu semanjai Sg Rejang enggau Sg Ba.
Penyanding Penemu PNA, Dr. Ajau Danis ti mega nyadi pengelicha kanan di UiTM Shah Alam madahka pengeraja Punan ke ditemu sereta deka dijaga Perintah Sarawak ukai semina nambah pengeraja Sarawak ke dikelala enggau adat pesaka mayuh macham pupu bansa, tang nusuika chara pendiau tiap pupu bansa ke bisi di menua tu.
“Kami enggai lenyau tauka punas identiti, pengeraja adat pesaka kami ngempung kami taja pan, rebak baru tauka kami empu diau dalam dunya ke moden,” ku Ajau.
Iya nandu baru madahka siti ari entara ‘kelirieng’ ke agi bediri digaga ulih bansa ‘raja Punan’ ba nanga Sungai Mia (ke ulu mimit ari genturung pendiau Punan) dipelabaka berumur urung beratus taun.
“Atas ‘Kelirieng’ tu, kelia bisi tajau Cina, lalu dalam tajau nya, tulang sereta rangkah ketuai Punan Sama ke dikangau kami enggau nama ‘Apai’ tauka ‘Ake Kelalit’ ke disimpan ulih sida sebilik ke dalam tajau nya.
“Taja pia, tajau nya kena churi, ti mega nyadi penanggul ke ‘Kelireng’ bukai laban semua utai tu nyerumba reta tengkira kami,” ku iya.
Peturun Ake Kelalit tu dipelabaka berats iku sida iya, agi bisi di Punan Sama, genturung pendiau Biau enggau Ba, ku iya.
“Entara bala ichit Ake Kelalit ke agi idup, ke dikelala kami, iya nya Seburat Among, nyadi pengajar di SMK Belaga, Nicholas Mering Kulleh (Penghulu bansa Punan) diau di Belaga, Ladang Keluka (di genturung pendiau Punan Sama), presiden PNA kami kediatu, Donny Dhwie enggau Pegawai Khas ngagai Menteri Muda Nembiak, Lumba enggau Main Sarawak, Daniel Batin,” ku iya.
Dalam kandang taun 60-an enggau 70-an ku iya, sekeda ari Kelirieng Punan ke ditemu niti Sg Rejang diberi ngagai sekeda ijinsi Perintah, kelebih agi Muzium sarawak enggau Muzium Nasional.
“Kelirieng Punan dikelala endar ari chura tauka ukir, dibanding enggau jerunai Melanau tauka ‘salong’ Berawan.
“Baka ‘ Keludan’ chara iya dikena sebaka enggau kelirieng tang kena sida ke bepengeraja tauka bujang berani,” ku iya.
Iya nandu baru madahka Kelirieng Punan ba pemun iya kelia, bisi (pattern) ke dikumbai ‘ulei jalo’, nyerumba intan tauka jala ikan.Dalam kandang berapa taun udah nya, chura kelirieng mayuh ngambi nyerumba pala mensia enggau rambai ke dikumbai ‘ulei Inan Benyai’.
Nandu cherita Ajau, Donny madah nitihka jerita tuai, sida iya nadai agi ngaga kelirieng, pengudah perintah James Brooke dalam kandang 1841,ku iya.
“Kebuah iya bansa nya nyangka Brooke enda ngasuh kami ngaga Kelirieng tu laban lebuh deka nirika kelirieng tu, begunaka (human sacrifice), ke enda ngipak jeman nya.
“Peturun Punan ke bepengeraja, lalu midang maya jeman nya, nirika kelirieng ke digaga ulih ulun sida ke bepengeraja, tauka bisi munsuh ke kena tangkap maya ngayau, sida tu meh ke nirika kelirieng,” ku Donny.
Iya nandu baru madahka nirika kelirieng tu pengawa ke mar digaga, laban nya nyengkaum semua komuniti, lalu dipelabaka nyau betaun udah nya baru tembu.
Kelimpah ari nya, Ketuai Biro Adat Pesaka PNA, Gebril Atong nguluka komuniti tu nyaga kelirieng di Opia Ba.
“Kami ngarapka Perintah menua deka mantu komuniti kami nyaga reta adat pesaka ke chukup berega ba kami.
“Tu ukai semina adat pesaka Punan, tang pengeraja adat pesaka Sarawak. Nyaga kelirieng nya ukai semina meri penguntung ngagai komuniti Punan tang ngagai menua tu mega,” ku iya.
Iya nandu baru ngarap pemun pansik ke digaga ulih dr. Antonio Guerreiro deka meri asil ke mujur, ukai (ad hoc) baka ke kala digaga dalam taun 80-an, ku iya.