Nembiak Primari Satu ke dijamah ba SK Nanga Ibun ngapuska seput lemai Hari Empat tu tadi
KAPIT: Pengudah enda ngeleda pengelama tiga hari, seiku nembiak Primari Satu ngapuska seput urung pukul 3.30 lemai, Hari Empat tu tadi di Sepital Besai Sibu.
Niang benama Jackson Nuing Anak Awe ari Rumah Untang, Sungai Yong, Kapit ditu, parai ketegal balat bakal ba pala, demaram muakka kiba tubuh iya enggau jari kanan.
Suspek nyamah, nembiak lelaki Primari Enam dipelaba ngena batang penyapu malu niang, mejal kibung ke dalam mulut sereta muai niang ke dalam tung uras.
Lebuh penusah tu nyadi, engka enda ditemu Pemantu Pengemata buding laban penyauh takah rumah bemalam enggau kuarter endur diau. Tambah mega, beentaraka injin api sekula ti inggar.
Penusah tu nyadi dipelaba ketegal niang nguji ngelaban suspek nyentukka iya ringat.
Penusah tu nyadi ba rumah bemalam lelaki di Sekula Primari (SK) Nanga Ibun, Sungai Pila, Batang Rajang. Semina bisi lima iku aja semua sida ke diau bemalam dia.
Dikena napatka sekula nya, nepan bot ekspres keterubah ari Kapit ngagai Nanga Merit, urung dua jam pengelama. Ari Nanga Merit ngagai SK Nanga Ibun ngena perau panjai, urung tiga ngagai empat jam pengelama bepanggai ba tikas pemesai ai.
Bisi 28 iku staf nyengkaum bala pengajar, staf kerani,jejaga, tukang kebun enggau Tukang meresi. Taja pia, semina 16 iku nembiak.
Penusah nyadi dipelaba antara pukul 9.30 malam ngagai 10.30 malam, 21 Ogos.
Pemantu Pengemata buding tetemuka niang enda ngeleda urung pukul 5.30 pagi, 22 Ogos.
Niang udah nya dibai berubat ngagai Klinik Desa Nanga Merit lalu apai niang dipesan.
Apai niang, 35 taun, ngaga ripot polis di Balai Polis Kapit pengudah dipadahka piak sekula.
Pengudah nerima perubat di Klinik Desa Nanga Merit, niang dibai ngagai Sepital Kapit lalu dianjung ngagai Sepital Besai Sibu. Ari CT Brain Scan tetemuka niang napi Massive Venous Infraction, demaram ba tubuh enggau jari kanan.
Tiga hari udah nya, urung pukul 3.30 lemai, 24 Ogos, niang ngapuska seput di Sepital Besai Sibu.
Ripot polis udah digaga di Opis Polis Sibu.
Suspek udah ditan Polis Kapit lalu kes tu dipansik ari baruh Seksyen 302 Kanun Keseksaan, nyema ditemu salah ukum gantung sampai mati.
Kepala Polis Negeri, Datuk Amer Awal di Indu Opis Polis Kuching udah ngeluarka penerang berita kena lemai Hari Empat.
OCPD Kapit DSP Freddy Bian udah dipadu Komisionyer Polis nguluka Tim Khas mansik kes nya.