DCF melanja iku pemesai opis perintah ngambi kus ba Harvard

KUCHING: The Dayak Cultural Foundation (DCF) ngaga pemutus deka nganjung tiga iku pemesai opis perintah bansa Dayak ngulu kus ‘crash courses’ ba sebuah universiti ke tebilang di dunya.

Chairman Datuk Amar Douglas Uggah Embas, ke mega Sapit Kepala Menteri, madahka Lester Matthew deka bekejang ke Universiti Harvard, USA bulan baru.

“Dua iku agi deka mupok taun baru ngambi kus ke sebaka . Tu dikena mantu pengeraja pengawa opis perintah nambahka penemu sida sereta ngulihka mayuh agi peneleba ,” ku Uggah ba penerang berita kemari.

Penerang nya dipansutka berindik ari aum kaunsil DCF ke bechairmanka iya kena Hari Tiga tu tadi.

Uggah, ke mega Menteri Betanam Betupi Moden, Tanah Adat enggau Pemansang Kandang Menu, madahka DCF deka bisi premis kediri empu tujuh ringkat ba Jalai Ong Tiang Swee ditu enda lama agi.

“Pengawa ngaga deka berengkah taun baru. Sebidang tanah nya diberi perintah ngagai yayasan,” ku iya.

Ku iya, yayasan udah melanja RM765,668 ba skolarsip dikena nembiak nampung pelajar sida.

Kenyau ari taun 2015, DCF udah mekuhka pengawa meri skolarsip ngagai nembiak Dayak ti nyulut ba pelajar sida, ke bulih kumulatif puku rata gred poin (CGPA) 4.0 dalam peresa Sijil Tinggi Persekolahan Malaysia (STPM),ku iya.

“Diatu, lima iku nembiak benung dipelanja DCF. Tiga ari sida nya benung belajarka bidang perubat ba Universiti Malaysia Sarawak (Unimas).

“Siku ngambi Bachelor Sains Sosial dalam Geografi di Universiti Kebangsaan Malaysia, Bangi lalu nembiak kelima benung ngambi Bachelor Seni di Universiti Sains Malaysia, Penang,”ku iya.

Taun tu, Uggah m adahka yayasan deka meri skolarsip ngagai peminta baru ti teuli- hka CGPA 4.0 dalam peresa STPM.

“Iya udah bulih ngambi kus Sains Pengurusan di Universiti Malaya. Yayasan mega bisi nyendiaka skolarsip ngagai nembiak bansa ke bulih sereta patut nerima ke landik bejaku English, sereta nampung pelajar ba universiti di menua tasik,” ku iya.