Pelajar, latih pengelandik deka chakah dipejalaika
KUCHING: Pekara pelajar enggau latih pengelandik pengidup ungkup orang besai tuai deka chakah agi dipejalai di kandang menua pesisir nyadika komponen besai dalam Program Transformasyen Menua Pesisir (RTP) enggau Pemansang Modal Mensia (HCD).
Opis Pemansang Mensia Mayuh ( KEMAS) nyadi pengembing besai bejalaika pengawa ti beguna endar ukai semina dalam nempa menua bansa tang RTP enggau HCD nengah pengawa ngaul mensia mayuh ba atur program ti ngaul pelajar anak mit enggau sida ke besai tuai, latih vokasional, pemansang ekonomi enggau pekara pemanah ulah di kandang menua pesisir, pia ku Kaban Parlimen (MP) Saratok, Tan Sri William Mawan Ikom.
“KEMAS nyadi gagasan ex-Menteri Besai, Tun Abdul Razak Hussein. Latih vokasional ungkup sida besai tuai, numbuhka Kolej Komuniti enggau ngenegapka KEMAS nyangka nyadi sebagi ari RTP tang ke bendar komponen Dasar Ekonomi Baru (DEB) Tun Razak. Pekara ke nyadi diatu iya nya inisiatif Tun Razak kenyau ari suba,” ku Mawan.
Lebuh Tun Razak nyadi Menteri Besai dalam taun 1961, iya mega mangku pengawa nyadi Menteri Pemansang Menua Pesisir enggau Kandang Menua, ku iya lebuhka dikerandau ditu,ensanus.
Peranak menua pesisir patut anang tinggal peluang ngangkatka diri empu ari pengawa latih ba pengelandik idup nengah kolej komuniti enggau program ti diatur KEMAS, ku iya.
Iya ukai semina muji pengawa KEMAS ti ngatur kus ba pengelandik idup ungkup sitak iya di Saratok, tang iya mega udah bejadika pengawa nutup Kus Jubah KEMAS di Kabong, Saratok, kena Hari Tiga.
“Pengawa ngaga jubbah bisi potensial ekonomi ukai semina di Saratok aja tang mega di serata Malaysia nyema industri desa, barang tu, dikemansangka agi, ku iya.
Berebak enggau nya, MP nya mega bisi nyuaka geran Projek Mit Pemansang Menua Pesisir (MRP) sepenyampau RM657,000 ngagai 31 bengkah gerempung ukai dikuasa perintah (NGO) nyengkaum masjid, surau, Serakup Apai Indai enggau Pengajar (PIBG) enggai Komiti Pemansang enggau Pengelikun Genturung Pendiau (JKKK) nengah chek di Opis Residen Saratok.
Dulu agi ari nya, iya ngena awak diri enggau bala pengundi ngirup pagi di pasar Saratok, ke alai iya betemu sereta berandau enggau Kaban Kunsil Nengeri (ADUN) Kabong Mohd Chee Kadir enggau Pemesai Pelilih Kabong Kamaluddin Alkap.