Pemisi jalai alun ngemuntang mensia mayuh ngulu program
KAPIT: Sapit Kepala Menteri Sarawak Tan Sri Datuk Amar Dr James Jemut Masing madahka enggau pemisi jalai, rayat deka lantang mindah kin kitu sereta ngatur program ti ulih ngempung mensia mayuh begulai.
Ku iya, suba Kapit mar deka dilawa laban nadai jalai. Diatu Kapit udah bisi jalai ti digaga ngagai Kapit, KapitSong- Kanowit. Kandang tiga tauka empat taun jalai ngelawa Tekat Ai Baleh, Kapit- Song- Kanowit deka tembu.
Diadang dalam bulan keterubah jalai deka sekut, mayuh peranak menua Kapit enggau sida ari luar deka datai, tang pengudah nya jalai deka pulai baka selama.
“Pengeramai baka Pesta Kapit – Pengawa Mandangka Dagang, Karnival Pengguna, Anugerah Carta Sapa Juara (ACSJ) IV 2017 mai mensia mayuh begempuru.
“Pengerami tu mega matak penatai orang ari menua luar, jauh enggau semak, ngambi bagi laban bisi sambung jalai enggau perengka pengangkut ti meruna,” ku Masing lebuh bejadika pengawa nutup Pesta Kapit ke diatur berengkah ari 11 ngagai 20 Ogos tu tadi ba Padang Bilun Lama, Jalai Padang Bilun ditu.
Lebih 3000 iku mensia mayuh datai nedat Pesta Kapit.
“Bisi 109 iku orang dagang ngambi bagi ba pengawa mandang enggau nyual produk sida. Tebal agi sida tu datai ari Kapit, sekeda ari Belaga, Song, Sibu enggau mega Sabah.
“Aktiviti ke bisi diatur nyerumba pesta tu baka Kapit Iron Men, Ratu Fest, Kapit Idol, Pekit Ngajat Beraban, ACSJ, Kus Kraf jari Ngayam enggau Manik, Pekit Ai Tuak, enggau ke bukai ti ngayanka Kapit ngembuan penau enggau pengulih,” ku iya.
Ku iya, Kapit deka nyadi rumah ngeluarka kuasa menua. Diatu, kitai bisi Bakun, Murum lalu ke diperambu Tekat Ai Baleh deka ngasilka ngempung 4,000 MW kuasa karan meri penampak ngagai menua enggau industri.
“Dulu suba, rambau pengawa ngereja batang, Kapit mansutka asil kampung eng- gau royalti kayu batang. Taja pia, agih belanja kelalu mimit diberi dikena ngemansangka Kapit.
“Diatu, perambu ngaga Tekat Ai Baleh laban aku enggaika Kapit tinggal di belakang. Tekat Ai tu nyadi peransang ngagai pemansang insfratruktur enggau penyikap perengka guna pemun ditu ngambika sebaka enggau di mengeri,” ku iya.
Residen Kapit Joseph Belayong madahka tu aktiviti empat dalam satu, Pesta Kapit – Pengawa Mandangka Dagang, Karnival Pengguna, ACSJ IV 2017.
Strategi Tasik Biru Nasional (NBOS) ngaul mayuh bengkah opis menteri nengeri enggau perintah besai, opis enggau sektor peribit bela begulai sereta besukung nentuka pemujur iya.
Sekeda batang tuju atur pesta tu dikena narit orang dagang ti bisi penau ngaul diri dalam pengawa dagang. Mandang sereta nyual asil sida. Bekunsika rentayan dagang dikena ngulihka belanja nengah aktiviti dagang sereta ngelala lagu enggau muzik Dayak ti bisi penau besai dalam nengeri tu.
Nengah atur pengerami 10 hari berunggu, urung 70,000 iku bisi nedat 107 buah bansal ti mandangka mayuh macham asil.
Sapit Residen Kapit Galong Luang ke nyadi chairman pengatur begulai mega bisi bejaku rambau pengerami nya.
Batang pengerami lemai nya baka Pekit Ai Tuak, Pekit Ratu Tropical Rainforest Kapit, Pentas Rayat, Kapit Idol, enggau ke bukai.
Sekeda bala ke bisi datai Kaban Parlimen (MP) Ulu Rajang Datuk Wilson Ugak Kumbong, Sekretari Politik Kepala Menteri Nicholas Kudi jantai enggau Tapah Ata, Residen Kapit Joseph Belayong enggau Sapit iya Galong Luang, sereta bala bukai.