Isu tanah nusutka runding bansa Dayak: Cobbold
Sebengkah penemu madahka tanah patut disukat dulu ngena Seksyen 6 sebedau ngena Seksyen 18
KUCHING: Parti Bansa Dayak Sarawak Baru (PBDSB) udah mujur ngatur Licha Tanah Adat Bumiputera (NCR) di Undop, Sri Aman kena ka 26 Ogos 2017 tu tadi.
Licha ti diatur ba Rh. Jerry Lai nya mujur teulihka resolusyen sereta simpul jaku penanggul tanah tu nusutka runding bansa Dayak Sarawak.
Presiden PBDSB Cobbold John madah isu tanah tu nusutka runding ketegal tanah disukat ngena Seksyen 6 enda ngemendarka pala tanah diberi ngagai pengempu tanah tang deka nyadi tanah ke diempu perintah nengeri Sarawak ke dikumbai ‘Native Communal Reserve’ (NCR) nitih ka genteran ba Kod Tanah Nengeri Sarawak.
Berindik ari nya, asil licha tu enda besetuju enggau penemu ti dipansutka seiku ketuai Dayak apin lama tu tadi, ke alai, penerang nya bisi mansutka jaku madahka pengempu tanah patut nyukat tanah sida ngena Seksyen 6 sebedau minta tanah sida nya disukat ngena Seksyen 18.
“Rayat enda setuju enggau penemu nya. Kebuah pia, laban enti tanah sida disukat nengah Seksyen 6, tanah sida deka nyadi tanah perintah. Perintah patut ngemendarka tanah NCR disukat terus nengah Seksyen 18”, ku Cobbold.
Iya nambah, atur perintah ti ngemendar ka tanah disukat ngena Seksyen 6 deka meri penyarut ngagai pengempu tanah enggau urang ti megai PL (provisional lease).
“Perintah ngeluar ka PL lalu meri kuasa megai PL nengah Seksyen 28 disempulang enggau Pom C. Penyarut nyadi lebuh pengempu tanah nagang pengempu PL tu ngereja pengawa ba tanah sida.
“Pekara tu balat ngirau ka rayat iya nya lebuh kompeni ngaji bala gangster ngemba sereta ngenakut ka pengempu tanah.
“Ba sekeda kes, baka di Sungai Lengan, sida diburu kompeni ari rumah sida”, tandu Cobbold John.
Iya madah pengawa perintah meri sukat tanah nengah Seksyen 6 tu semina dikena ngemuntang ka pengawa beberika PL, laban nengah Seksyen 6 tu tadi tanah nya diempu perintah.
Cobbold madah penemu baka nya terang betingkah enggau jaku ti dipansut ka Datuk Amar Awang Tengah ba Sarawak Tribune taun 2005 suba.
Nitihka berita nya, Awang Tengah nyebut sebarang tanah ke enda disukat tau ka nadai pala deka diambi nyadi tanah perintah.
Cobbold nyema ka bida penemu tu baka ajat ti enda nitih ka taboh.
“Nya alai, perintah Barisan Nasional negeri Sarawak seruran enda mujur ngatur sereta nyeruri Kod Tanah Sarawak laban sida ngembuan penemu ke enda seati kelebih agi ba tanah ke diempu bansa Dayak,” ku Cobbold.
Berindik ari nya, pengempu tanah diperansang sama bela nyukat tanah sida nengah private surveyor ke alai nguna sistem GPS ke diterima ba Kort.
“Kami ngambi kira jaku ke dipansutka Datuk Amar Awang Tengah, lalu anang enda nyukat tanah kita enggaika diambi perintah”, tandu iya.
Pengawa nyukat tanah nengah sistem GPS udah mujur amat dipejalai ka DBNA ba taun 2009 ke alai 56 iti kar tanah GPS ke mungkur 50 iti genturung pendiau Dayak Bidayuh udah diserah ka ngagai niang Tan Sri Adenan.
“Nya kebuah aku ke mangku pengawa nyadi Presiden Parti Bansa Dayak Sarawak, ngasai ka tu tanggungpengawa ngerempung bansa Dayak beserakup ngetan ka hak ekslusif tanah sida iya nya nengah Seksyen 18.
“Penemu Barisan Nasional nyukat tanah nengah Seksyen 6 tu semina panjuk politik aja.
“Seksyen 18 semina mayuh diberi ngagai urang sida lalu Seksyen 28 diberi ngagai ‘tauke besai’ enggau sebengkah urang elit aja. Tang Seksyen 6 ke nadai rega ba bank diberi agai bansa Dayak”, ku terang Cobbold nyemetak.
Rayat enda setuju enggau penemu nya. Kebuah pia, laban enti tanah sida disukat nengah Seksyen 6, tanah sida deka nyadi tanah perintah. Perintah patut ngemendarka tanah NCR disukat terus nengah Seksyen 18. Cobbold John Presiden PBDSB