Paren Nyawi deka ngarika DAP bediri ba sitak Parlimen Kapit
KAPIT: Chairman Parti Tindakan Demokratik (ADP) Sarawak, Chong Chieng Jen ke mega Kaban Parlimen (MP) Kuching udah mantaika nama Chairman DAP Katibas, Paren Nyawi nyadi chalun sitak Parlimen Kapit maya Pengawa Bepilih Besai Ke-14 (PRU14) tu ila, kena 25 tu tadi.
Pengawa tu udah diatur rambau pengerami makai lemai diatur begulai DAP pampang Kapit enggau DAP pampang Katibas di sebengkah restauran di Bletih ditu lalu udah digulu 150 iku temuai.
Paren Anak Nyawi, 35 taun, ari Rumah Jarop, Nanga Sepadi, diatu mangku pengawa nyadi Chairman DAP Katibas Song. Iya mega nyadi Pemantu Khas MP Sibu, Oscar Ling. Paren, gawa nyadi akauntan, ex-nembiak UiTM (Ijazah Sarjana Muda Perakaunan).
Sekeda bala ke bisi datai Chariman DAP Sarawak Chong Chieng Jen, MP Sibu Oscar Ling, Pengari Go Rural DAP Sarawak Thomas Tegong Laka, Paren Nyawi enggau Sekretari DAP Kapit Larry Asap.
Batang tuju atur pengerami lemai nya deka ngaul raban penyukung DAP di Kapit nyerumba pengawa ngelancharka raban gawa ungkup PRU14.
Maya pengawa bepilih tu ila, DAP Sarawak deka bediri minta pilih ba semilan sitak iya nya Mas Gading, Bandar Kuching, Stampin, Serian, Sarikei, Lanang, Sibu, Mukah, Kapit, Bintulu enggau Lawas.
Kesemua nya bisi 31 sitak Parlimen di Sarawak, ke bukai deka diarika pengari ari PKR enggau Amanah. Pakatan Rayat Sarawak diari tiga parti; Parti Keadilan Rakyat (PKR), DAP enggau Amanah.
Chong minta bala pengundi meseti berani ngundi penyakal maya pengawa bepilih tu. Ku iya, kitai ngemeranka pengawa demokrasyen lalu maya pengawa bepilih, rayat deka ngundi dikena numbuhka perintah.
Sekeda bala ke bisi mansutka jaku rambau atur pengerami lemai iya, Larry Asap, Paren Nyawi, Oscar Ling enggau Thomas Tegong Laka.