Satelit ‘ballon’ lebih manah ari tiang telekomunikasyen
KUCHING: Kandang menua ke jauh di ulu di serata nengeri tu disadang nguna satelit ‘balloon’ dikena nyendia arus internet.
Kepala Menteri Datuk Amar Abang Johari Tun Openg madah satelit ‘balloon’ ulih nyendia arus internet ke manah agi enti dibanding enggau tiang telekomunikasyen.
“Nengah satelit ‘balloon’, arus internet ulih disedia ngagai semua kandang endur ngelingi, enda baka tiang telekomuniksyen ti napi pemar ba kandang ke bebukit,”ku iya.
Abang Johari mansutka jaku nya rambau bejadi TEGAS Digital Innovation Hub(TDIH) di ICOM Square ditu, kemari.
Iya nambah, projek pemungkal satelit ‘balloon’ udah diadu di Long San, Ulu Baram nengah kerejasama seiti kompeni ari Silicon Valley, Amerika.
“Enti mujur, kitai deka nyadi nengeri keterubah nguna chara tu ba dunya,”ku iya.
Ngenang kaul bukai, Abang Johari madah ba penemuai kereja iya ke Long San kena Kena Hari Minggu tu tadi, raban volunteer ari Silicon Valley bisi meri tuisyen sains enggau matematik ngagai nembiak dia.
“Perundingka raban volunteer ari Silicon Valley sanggup ke Long San lalu ngajar nembiak kitai Algebra enggau Algorithma.
“Nembiak kitai di Long San belajar Algebra ngena ‘Tablet’.
“Enti sida di menua ulu tu mujur, kitai ulih ngadu pekara ke sama ba menua ulu bukai ngambika nembiak kitai landik ba matematik,”ku iya.